ORANJESTAD (AAN): Un informacion publica e siman aki den e corant The Daily Herald na St. Maarten, ta mustra cu e isla di Saba tin un problema serio cu
e cantidad di cabrito cu tin ta cana rond aya. Y el a bira un problema, cu hasta a bay te na nivel di Gobierno pa asina busca un solucion.
E solucion ta pa djis tira nan mata!
E asina yama “Goat Control Project” no a cuminza ainda, pasobra gobierno di Saba ta wardando riba yegada di riflenan y municion cu lo wordo usa pa elimina e cabritonan cu ta canando los tur caminda.
E yegada di e riflenan a tuma mucho mas tempo cu originalmente planea of spera, principalmente debi na asuntonan logistico y capacidad limita di cargo debi na e pandemia di Covid-19.
Inicialmente e riflenan mester a bin for di Merca. Sinembargo debi na problema cu stock debi na e pandemia y e clima social, no por a busca rifle ni municion for di Merca.
A check si por busca rifle y municion for di Hulanda, pero aki a bin haya sa cu ni KLM y tampoco Air France lo no transporta nan.
E di tercer opcion tabata busca di Reino Uni, y esey ta posible, pero e riflenan lo tin di wordo transporta pa Saba pasando via Merca y St. Maarten. Pa esaki, permisonan di transito tin di wordo busca pa asina e tipo di carga di rifle pasa doro di e dos paisnan aki. Recien a keda cla cu e permiso pa Merca. Awor nan ta buscando permiso di Ministerio di Husticia na St. Maarten.
Unavez cu tur permiso ta cla, e compania na Reino Uni por manda e equipo, cu ta rekeri un transportacion safe te na Saba.
Tur e tardanza aki a pone cu e poblacion di cabrito a crece aun mas. Pero toch Gobierno a vigila y traha mapa di e cabritonan aki riba henter e isla. Na na vigila e areanan unda hopi biaha cabritonan tey, a studia e comportacion di e animalnan, a prepara tacticanan y a crea zona pa permiti lugar unda nan por bay tira y mata nan na un forma eficiente y safe.
Saba a mustra, cu pa elimina un especie invasivo, manera cabrito, velocidad ta importante pasobra cabritonan ta reproduci rapidamente ora nan ta los. Pues nan ta bruy cada rato.
Unavez cu e rifle y municion yega na e isla, e specialistanan lo cuminza tira cabritonan na Mt. Scenery National Park.
E asina yama ‘Goat Control Project’ ta parti di e Caribbean Netherlands Nature and Environment Policy Plan 2020-2030, cu tin meta pa proteha rifnan di coral, y tambe e parkenan nacional.
Ora cu nan caba di mata e cabritonan na Parke Nacional, e specialistanan lo cuminza tira cabritonan for di e area unda tin e Dump, y tambe for di Fort Bay Road.
Mirando e urgencia pa algun doño di tereno priva cu ta sufri hopi molester di e cabritonan aki cu ta destruyendo hardin y partinan di agricultura, nan por invita e specialistanan pa bay tira e cabritonan aki tambe.
Aworaki tin un periodo di gracia te cu 30 di April y doñonan di cabrito por pidi un extension di 3 luna, pa asina nan haya chens pa kita lo mas hopi posible nan animalnan di areanan liber. Algun doño di cabrito tabata hopi activo ultimo temponan pa kita y bende nan cabritonan.
