ORANJESTAD (AAN): E edificio cu antes tabata Outback Steakhouse, y cu despues a bira Trop Casino y despues Eagle Aruba Casino, no a mira hopi turista y
cliente drenta e portanan desde cu Pandemia di Covid-19 a cuminza na Aruba. Debi na lockdown obligatorio pa tur casino, y tambe no tabatin turista, e lugar a keda cera y tabata ricibi Subsidio di Salario pa yuda cu e pago di e 68 empleado cu nan tabatin riba payroll.
Eagle Aruba Casino Operating Corporation NV ta un subsidiario di Abura Development Corporation VBA y nan tabata analiza cifranan. Aunke e subsidio tabata yuda paga salario, e resto tabata hopi duro pasobra no tabatin turista ta drentando e Casino, y e mester tin cierto cantidad minimo di turista eyden sikiera pa por haya placa pa cubri gasto, y debe tabata crece na forma astronomico. E debe a yega riba di 10 miyon Florin.
Debi na esaki, decision a ser tuma door di gerencia dia 4 Januari 2021 pa finaliza operacion di e Casino, y nan a ofrece e trahadornan un pakete di retiro cu ta inclui e cesantia obligatorio. Di e 68 empleadonan aki, mesora 60 a acepta e oferta. Tabatin 8 empleado cu no a acepta e oferta di pakete, y uno di nan ta e empleado Giorgy G. Wouters di 27 aña di edad. E mes a drenta den servicio dia 31 di Juli 2019 y a ocupa e funcion di Asistente, cobrando salario di 2.217 Florin pa luna.
Como cu gerencia y Wouters a keda na un status quo, e compania a dicidi na bati na Corte di Husticia pa haya OK pa haci esaki. Den Corte a ser treci dilanti, cu e Casino aki situa net pabao di caminda di Avenida Nelson Oduber, a mustra cu nan a registra mal resultado financiero, cu perdida di 2018 te cu 2020.
Si su banda, e empleado Wouters a bisa Huez cu e peticion pa disolve e contract di trabao mester wordo rechaza pa varios motibo, incluyendo cu e peticion pa termina contract di trabao pa motibo economico mester ta algo cu ta cay bao decision Director di Departamento di Labor. El a mustra cu Eagle Aruba Casino no a bin cu suficiente fundamento pa solicita disolve e contract, como cu nan no a presenta cu Relatonan Anual Financiero aproba di ultimo añanan.
Wouters a argumenta cu e oferta di pakete ofreci pa Eagle Aruba Casino no ta rasonable, pasobra segun protocol tin di tene na cuenta e cantidad aña di servicio y mester usa factor di coreccion cu tin na cuenta cu Wouters no tin perspectiva di otro trabao pa motibo cu e isla ta pasando den crisis di Coronavirus.
Aki e empleado Wouters ta pidi por lo menos un suma di 9.000 Florin. El a subraya cu debi cu otro empleadonan a acepta e pakete, no ta un motibo pa nan condena Wouters cu e mesun suma.
Pero Corte a mustra cu no ta necesario pa e compania presenta nan cuenta anual dilanti Huez. Es mas, Departamento di Labor tampoco no ta impone rekesito pa presenta cuenta anual si acaso nan pidi pa kibra contract di trabao pa empleadonan.
Corte a bisa si Wouters tin derecho pa un compensacion mas halto, calcula cu un acuerdo di principio di Corte, y e situacion financiero di Eagle Aruba Casino y e posibilidad di pago di un compensaicon husto.
E debe di riba 10 miyon Florin, nifica tambe cu e compania no tin modo pa paga e otro 7 empleadonan cu ta solicita pago similar, pasobra e lo yega na un suma di 170.961 Florin pa paga.
Corte lo bay calcula compensacion na un forma husto pa un acuerdo di peticion di Eagle Aruba Casino, y lo duna salario tambe durante periodo di notificacion cu Wouters tin derecho riba dje. Corte lo considera un indemnizacion pa retiro di 3.500 Florin. Huez a mustra cu Eagle Aruba Casino lo tin di bay cubri salario di abogado cu ta stipula na 1.000 Florin.
Pero si acaso Eagle Aruba Casino no retira e peticion di retiro, e ora Huez lo considera cu tin un motibo pa compensa costo legal entre partidonan, y esey nifica cu den sentido cu cada partido lo tin di carga nan mesun gasto. Corte a duna Casino chens pa hala atras e peticion di retiro via un declaracion por escrito registra na Corte dia 23 di April 2021, cu un copia pa Giorgy Wouters. Den e caso aki, Eagle Aruba Casino lo por ordena pa paga su mesun 1.000 Florin como salario di abogado.
