Tur pais rond mundo tin retonan pa loke ta "vergrijzing" y Aruba no ta un excepcion

Prome Minister a atende apertura di e prome Foro Nacional pa Adultonan Mayor

ORANJESTAD (AAN): Diamars mainta, Prome Minister Evelyn Wever-Croes a atende e apertura di e prome foro nacional pa adultonan mayor. Presente tabata sectornan priva, semi-publico y publico, y mas di cien participante, cu a bin hunto pa asina defini kico ta necesario pa bin den e plan di maneho den bienestar di nos adultonan mayor.

            Prome Minister a splica cu tur pais rond mundo tin retonan pa loke ta "vergrijzing" y Aruba no ta un excepcion. P’esey, e foro aki ta di suma importancia, pa asina hunto por defini ki caminda lo mester cana pa asina logra yega na resultadonan, den e miho interes di nos grandinan.

            Pa Gabinete Wever-Croes, nos adultonan mayor ta un prioridad, y p’esey a mira e necesidad pa pone un minister di e Gabinete encarga cu e tema aki. Den e ultimo añanan, Gobierno a bin ta haciendo hopi cos na beneficio di nos adultonan mayor.

            Pa di 3 biaha caba a aumenta e pensioen di biehes, y a traha na reduci e peso di impuesto pa nos grandinan. Pero mirando e retonan grandi cu tin, pa loke ta trata e adultonan mayor, a haya necesario pa organisa un foro na unda comunidad ta bini hunto pa asina bin cu ideanan pa loke ta e plan di maneho. Pa cu esaki, Prome Minister ta gradici tur participante pa a acepta e invitacion pa atende e foro importante aki.

            Tambe, Prome Minister ta gradici Minister Ursell Arends, cu ta encarga cu e cartera importante aki, pa dedica su mes na nos adultonan mayor, cu hopi pasion y perseverancia. Danki na su trabou y na su team, awe e por entrega e resultadonan di un investigacion di dos aña cu el a haci riba e tereno aki, pa asina logra yega na resultadonan positivo, creando asina progreso y bienestar pa nos grandinan.