CEO di AHATA Tisa Lasorte:
ORANJESTAD (AAN) – E director di Aruba Hotels And Tourism Association (AHATA), Tisa LaSorte, tambe a elabora riba e tema di adulto mayor. El a wordo invita na e Congreso pa e minister concerni, y LaSorte ta haya importante pa AHATA ta presente, pasobra e sector di HORECA ta esun di mas grandi den genera empleo.
“Esey kiermen, cu nos ta hopi conciente di loke ta pasa den nos comunidad, y e ‘baby boomers’ ta un grupo grandi cu ta bay crece mas, pues e grupo di adulto mayor ta bay keda crece”, LaSorte a indica.
El a agrega cu na Aruba tin hopi problema caba di lista di spera pa hendenan drenta den cas di cuido, si un hende kier cuida nan mama of nan tata na cas, e cuido ta hopi caro, pues tin un dificultad na Aruba cu cuido di nos adultonan mayor.
“Nos ta sinti cu ta importante pa participa den un proceso na unda nos tur ta bin hunto, pa wak si nos por yega na cierto plannan, na cierto solucionnan pa futuro pa wak si nos por drecha nos cuido pa nos adultonan mayor”, Tisa LaSorte a bisa.
LaSorte a subraya cu si un adulto mayor por traha y ta productivo mester dun'e e oportunidad ey. “Bo ta djis engrandece bo mercado laboral pero ora yega e momento cu nan no por ta productivo mas y a pasa e edad pa nan por bay cu pensioen, mester por tin un manera cu por cuida nan”, Tisa LaSorte a señala.
El a comenta tambe cu e pension di behez no ta un suma grandi y hopi adulto mayor ta haya nan mes den dificultad, ora nan no tin entrada pa cuida nan mes. “Pesey, nos tin cu haya un solucion conhuntamente, tur e gremionan, tur organizacion. Mi a tende cu 135 organizacion a keda invita pa e Congreso aki, y mi ta spera cu tur a bin, pasobra esaki ta un problema nacional pa nos por soluciona hunto. Pero enberdad, entre mas tin baby boomers cu ta bira di mas edad, tanten cu nan ta productivo y kier ta productivo, mester tin e oportunidad pa nan traha tambe”, Tisa LaSorte, CEO di AHATA a reitera.
