Tur medida contra Covid-19 ta keda elimina  

Prome Minister Evelyn Wever-Croes --- *entrante diahuebs 17 di Februari Aruba ta habri bek

ORANJESTAD (AAN)—“Cambio di Maneho di Covid-19” ta e tema cu a wordo trata den conferencia di prensa di gobierno, Diaranzon mainta, den cual a hiba palabra Prome Minister Evelyn Wever-Croes, Hefe di DBZ Sharline Koolman, y CEO di Oficina di Turismo Ronella Croes.

Prome Minister a cuminza pa bisa cu e meta di e conferencia di prensa aki, ta pa anuncia cu Aruba ta habri bek, prome cu el a indica con esaki lo tuma lugar, el a splica “di con mester habri bek”.

E mandatario a bay bek na dia 13 di Maart 2020, cu ta e momento cu Covid a cuminza, y cu ta exactamente 705 dia pasa. 705 dia cu pa henter comunidad tabata hopi pisa y dianan yena cu inseguridad pasobra nos no tabata sa kico ta bay pasa. Dianan yena cu dolor pa e sernan keri cu a bira malo cu a fayece, pero tambe hopi dificil pa nos hobennan cu no por a expresa nan mes, ni sikiera bay scol na un manera normal. Pa esnan cu ta traha den sectornan cu mester a cera manera Horeca, cultura y deporte cu tambe a sufri hopi.

“Nos tur ta concuri cu e periodo di covid tras di lomba, en todo caso, a haci hopi daño y el a dividi hopi, den nos comunidad”, Minister Presidente a expresa.

E mandatario a señala cu aworaki Aruba ta bay drenta den otro fase, aunke tur hende sa cu covid ta keda pa un tempo ainda, pero mirando e cifranan cu Aruba a cuminza siña biba cune loke a pensa cu no ta posible, a demostra di ta posible: esta, cu e vacuna ta proteha nos miho y cu e variante omicron ta mas leve, y pesey aworaki, gobierno ta bisa cu ta bay pone atencion na otro areanan, cu pa e ultimo 705 dianan mester a wordo restringi.

Minister Presidente a subraya cu gobierno a anuncia e strategia di salida un luna pasa caba, unda ta cuminza habri stap pa stap, y awo gobierno ta bay dal un stap hopi grandi. E dignatario a expresa “y nos por haci esaki pasobra nos ta bayendo hopi bon, mirando e casonan activo cu tin”, y el a agrega cu e casonan activo ta 62, te cu diamars di e siman aki, y esaki ta hopi bon. El a comenta cu e ultimo biaha cu na Aruba tabata tin 62 caso activo tabata exactamente siete luna pasa, esta, 16 di Juli 2021.

“E ultimo lunanan aki nos a conoce casonan cu a yega te na cinco mil, pero nunca nos tabata na e nivel aki. Kiermen, esaki ta indica cu nos ta bayendo hopi bon”, Minister Presidente a declara.

Otro indicador importante a hospital. Durante e ultimo ola di omicron hospital a yega na un maximo di 55 persona cu covid na hospital, y awe tin 13 persona den hospital cu tin e virus. Otro parameter hopi importante, cu gobierno ta para na dje, ta Cuido Intensivo. “Nos ta depende di nos capacidad di intensive care y nos ta mira cu den omicron, e maximo cantidad di persona cu covid den UCI tabata seis y awo nos por mira cu ta na un, y prome cu esaki tabata tin tres dia cu no tabata bin ningun hende cu covid na Intensive Care”, e dignatario a remarca. Segun e criterianan cu e mandatario a caba di trece pa dilanti, aworaki mester flexibiliza mas. “Nos no tin hustificacion pa mantene e medidanan cu nos tabata tin” Premier Wever-Croes a acentua.