Menasa Ruso cu e por pone Cuba y Venezuela den accion ta realidad --- *DIARIO cu prueba cu awe Aruba por tabata depende di satelite Ruso --- *Aliansa Venezuela/Rusia confirma na Vice Prome Ministro di Rusia
ORANJESTAD(AAN)—For di e momento cu e crisis na Ukraine a bira un confrontacion abierto entre Rusia y paisnan liber, DIARIO a mustra riba e peliger grandi cu lo tabata existi pa Aruba, si e proyecto di Citgo a wordo realisa na Aruba.
Ayera mientras e situacion mundial tabata culmina y Merca y Europa tabata sigui prepara na forma intenso pa un invasion di Ukraine, DIARIO a ricibi e informacion cu oficialmente Gobierno Nicolas Maduro a confirma su sosten pa Rusia.
Awe cu prueba den man, DIARIO ta sigui analisa e peligro enorme na cual Aruba a wordo expone na momento cu a firma un acuerdo cu Nicolas Maduro, cu pa medio di Citgo, lo a haya forsa economico riba Aruba den su man.
For di 2018, DIARIO a mustra cu Aruba mester a busca solucion urgente pa e forma cu Aruba tabata rehen di Venezuela pa medio di e acuerdo cu Gobierno Mike Eman a firma cu regimen Venezolano, cu pa medio di PDVSA ta e doño riba papel di Citgo, cu realmente pa medio di borg, pa practicamente mitar ta propiedad di Rusia.
Awe cu prueba den man pa e peligro di cual Aruba a scapa, pa adverti politiconan di awe y futuro pa e peliger grandi na cual nan por expone Aruba, nos ta sigui analisa cada desaroyo cu ta mustra cu na 2016, Gobierno Mike Eman a entrega Aruba na un peligro enorme cu a haci Aruba rehen di Rusia!
Den e analisis di awe, e prome conclusion lo bira cu Venezuela ta un rehen financiero y economico di Rusia, cu pa medio di sumanan enorme cu el a Venezuela como prestamo, por dicta ley na Venezuela cu hasta bou Guaido, financieramente lo depende di Rusia.
Si mitar di Citgo ta di Rusia, ta pa motibo di e cantidad di placa cu Rusia a hinca den Venezuela, cu a cay den situacion di bancarota bou regimen di Chavez y Maduro.
Hugo Chavez a alcansa poder pa medio di Cuba, caminda Rusia a haci cu e continente Americano, loke e tin miedo cu mundo liber lo haci cu Rusia pa medio di Ukraine.
Rusia a haci su entrada na continente Americano pa medio di Fidel Castro, cu na December 1958 a canta victoria riba Fulgencio Batista cu e revolucion Cubano.
E lider Ruso Nikita Khrushchev asina por a militarisa Cuba, cu ta situa den porta di Merca y tur propiedad Mericano na Cuba a wordo confisca.
Cuba a bira e centro comunista na e continente Americano y prueba di dictadura y colonialismo Ruso, cu awe a manda Cubanonan cu ta protesta contra e actual Gobierno di Cuba, prison.
E expansion di comunismo na e continente Americano a bira posibel, loke ta hustamente e experencia cu awe ta causa e panico di Vladimir Putin, pa Ukraine no bira parti di Union Europeo y asina parti di e paisnan Aliado NATO.
Ta den un situacion cu por bira un guera mundial, e berdad di e peliger na cual Gobierno Mike Eman a somete Aruba a bira realidad y Aruba por comprende kico lo a pasa si awe tin Citgo na Aruba.
Citgo ta e fortalesa Ruso cu ta simbolo pa e realidad cu Nicolas Maduro ta rehen di Rusia, cu ayera pa medio di su Vice Prome Ministro Yuri Borisov a realisa un bishita na Venezuela.
E Vice Presidente di Venezuela, Tareck Aissami na e sede di PDVSA a reuni cu un delegacion Ruso encarbesa pa Borisov. Aissami a ratifica e apoyo y solidaridad di Gobierno Venezolano na Rusia, cu manera el a mustra, a sostene Venezuela contra medidanan di Merca, cu por cierto tin sosten di henter mundo liber incluso Europa.
Na inicio di e actual conflicto, Rusia a declara publicamente cu e por “deploy” (pone den accion) Cuba y Venezuela, cu ta e dos puntonan strategico mas importante di Rusia na continente Americano.
Kico lo a pasa na e momentonan aki si Aruba tabata tin un refineria Venezolano, dirigi directamente pa e grupo di Maduro y asina Rusia, riba su suelo?
Awe dilanti costa di Aruba, Rusia y Venezuela a confirma nan union, cu por tabata visibel tambe na San Nicolas Aruba, den un conflicto mundial si Prome Ministro Evelyn Wever-Croes no scrap e acuerdo cu Venezuela, cu a haci posibel pa e representantenan mas grandi di Nicolas Maduro, di PDVSA, a sinti nan mes na cas na Aruba!
