Tur informacion di pashent awor sigur den 'datacenter' na Aruba mes

Horacio Oduber Hospital y Setar NV ta firma acuerdo:

ORANJESTAD (AAN):  Algun luna pasa Horacio Oduber Oduber (HOH) a anuncia e proyecto importante pa loke ta implementacion di su sistema electronico di pashent (EPD) nobo di e compania Hulandes Chipsoft cu e programa HiX. Un paso importante den loke ta optimalisacion di procesonan di data y cuido.

            E siguiente paso importante ta pa busca un compania pa ‘host’ e data di Hospital. Despues di a busca diferente opcion internacional, sr. Gregory Croeze, miembro di Hunta di Directiva di HOH a indica cu a haya e opcion na Aruba mes, esta nos compania local Setar NV.

            Durante un mainta ameno Directiva di HOH hunto cu Directiva di Setar a bini hunto pa asina concretisa e acuerdo aki. Sr. Jacco Vroegop, Presidente di Hunta di Directiva tabata sumamente contento cu a logra yega na un acuerdo cu nos compania local Setar NV.

            E enfoke di e acuerdo ta pa sigui mantene siguridad di informacion di nos pashentnan den e EPD nobo, cu tambe ta parti di e calidad di cuido cu hospital ta brinda. 

            Indicadornan importante pa e compania por ‘host’ informacion asina sensitivo di pashent ta sigur e siguridad di data, certificacion internacional di capacidadnan di ‘datacenter’ y un sistema cu ta brinda diferente conexion den e red pa asina evita cualkier interupcion. Hospital ta sumamente contento paso Setar a entrega un oferta atractivo cu ta cumpli cu tur e rekisitonan y di e forma aki e data por keda Aruba mes. Tur pashent por ta sigur cu nan informacion ta safe y bon warda y tambe hopi lihe disponibe. HOH no ta e prome compania cu Setar ta ‘host’, pues nan tin experiencia caba cu companianan local y internacional, cu ta duna nos como directiva mas confiansa cu a haci e escogencia corecto, asina sr. Croeze ta indica.

            Sr. Roland Croes, Director di Setar NV, a expresa cu awo lo brinda un servicio adicional na hospital. Den e ‘datacenter’ di Setar NV lo tin disponibel un total di dos ‘racks’ pa e ‘servers’  nobo di HOH. Ademas lo tin un conexion di speed halto cu HOH di 1 gigabit. Awo cu e acuerdo aki HOH ta bira un di e clientenan grandi cu nos di Setar NV lo bay brinda e servicio aki na dje. Awo na Setar NV un cliente por tin su data sigur sin cu e ta cay mirando cu tin backup. Un adelanto grandi pa Aruba y pa e cuido na Aruba y pa nos di Setar NV e ta un orguyo pa a haya e oportunidad pa ofrece e servicio aki na tur pashent di HOH.  

            Siendo un hospital cu tabatin 10.041 caso di hospitalisacion aña pasa, a trata 34.161 pashent na Departamento di Emergencia, su specialistanan hunto tabatin 84.694 consulta, a opera 6670 pashent y a yuda 878 baby nace, ta obvio cu e cantidad di informacion di pashent ta grandi. Y ta necesario pa e ta warda na un luga sigur y accesibel. Y aki ta caminda cu Setar a cay aden y a haci e bida di e empleadonan hopi mas facil y proceso ta bira mas eficiente.