Incidente serio na Hulanda ta exigi discusion importante na Aruba
*Futuro lider y experto ta wordo introduci na comunidad mundial
*E papel importante di clubnan di studiante den creacion di mañan
ORANJESTAD (AAN)—Como isla Aruba ta mara na e cantidad di posibilidadnan cu tin pa creacion di un base profesional, loke ta haci cu despues di educacion secundario, studiantenan mester busca continuacion di nan preparacion profesional, den exterior.
Mayoria lo bay Hulanda, caminda sin duda personal cualifica y dedica na Cas di Aruba, ta vigila nan bienestar.
Sinembargo, na momento cu e hobennen cera porta di su cas paterno na Aruba pa bay para riba su propio pia, e kier y mester ricibi e posibilidad pa e siña bula sin cada rato mester pidi asistencia na su neishi, cu si mester keda habri pa cualkier necesidad cu por sigui.
Continuacion di estudio den exterior ta tuma lugar na e momento cu un hoben ta alcansa e edad, cu ta habri porta pa e hiba un bida completamente independiente.
Sigur si tene cuenta cu e diferencianan social familiar na Aruba y entre otro Hulanda, por nota cu lazonan familiar di un hoben na Aruba ta mas intimo cu den exterior den e temporada cu e palabra “hubentud” ta e salida di infancia pa drenta bida adulto, cu tur exigencia cu esaki ta encera.
Na Hulanda e hoben ta topa, cu un sistema cu ta diferente na e base Arubano riba terenonan sumamente importante den su desaroyo como hende.
Pues e mester drenta un cas nobo, cu custumbernan nobo pa asina e por atende e instituto educacional, cu lo bira su instrumento pa futuro.
Con e ta progresa den su ambicion profesional, ta uno di e puntonan di interes conoci.
Sinembargo, tin un dimension mes of talbez mas importante, cu no ta bini dilanti na hopi ocasion pero cu mester di mas atencion.
Institutonan educacional Europeo y te ainda un cantidad di institutonan Americano, ta habri porta directo di preparacion di e studiantenan como hende den e comunidad internacional cu nan mester bay sirbi.
Estudiantenan ta uni na fraternidadnan, na organisacionnan, clubnan caminda nan ta wordo prepara pa forma parti riba tereno social di e grupo internacional di ciudadanonan profesional.
Ta trata aki di un aspecto sumamente importante cu ta crea tambe basenan dilazonan profesional internacional, cu ta bira disponibel na miembronan di organisacionnan hubenil, cu ta bira pasaporte den e futuro di hobennan.
Pero siman pasa, atrobe alarma a wordo bati pa un incidente sumamente importante na Hulanda, caminda studiantenan a wordo maltrata y accion mester a wordo tuma contra un abusador cu a penetra den uno di e organisacionnan di estudiante mas conoci na Hulanda, cu ta Vindicat Atque Polit na Groningen.
Ora bay den historia di e Vindicat Atque Polit, Corps, cu na 1970 a uni cu e grupo estudiantil femenino Magna Pete cu den realidad semper tabata su socio riba tereno social, ta atende cu un grupo cu na Hulanda ta realmente prestigioso y hasta tin lazo directo cu e defensa di Hulanda den temponan historico.
Pa por bira miembro di e club, mester pasa e asina yama “ontgroening” den cual e studiante ta wordo prepara pa por participa na e mundo social di profesionalnan na e nivelnan mundial mas halto.
Asistencia na e clubnan estudiantil ta crea lazonan importante pa futuro di e profesionalnan, cu pa medio di nan club semper ta keda den contacto, hopi bez te na morto.
Sinembargo, e studiante ta wordo prepara, pa por confronta situacionnan menos agradabel cu su profesion ta trece cune. Ta afende entre otro cu e sensacion di miedo. E forma cu e mester presenta como profesional y e base cu e mester tin como dirigente cu no ta permiti nada deshaci di e logro cu tin dilanti.
Durante e periodo di introduccion “ontgroening”, e studiante nobo mester bolbe na e estado di hende mas humilde pa e wordo reforma pa condicionnan ehecutivo y dirigente.
Comportacion den sociedad cu exigencia di dirigente, mester crea e hende fuerte cu un dirigente mester ta.
Miembronan cu ya tin años den e club ta dirigi e proceso di “ontgroening” cu den historia na dos occasion, a duna motibo pa abuso cu a wordo presenta.
Siman pasa atrobe a yega e momento cu alarma a wordo bati pa e forma cu algun di e hobennan cu kier bira miembro, a wordo maltrata y herida na nan cara dor di un miembro cu mester a asisti den nan formacion.
E miembro abusador awor ta den man di husticia. Medidanan ta wordo tuma. Pero tambe alarma ta wordo bati pa na Aruba prepara hobenan pa loke por pasa den ambiente di clubnan y loke ta permisibel of mester wordo denuncia imediatamente.
Mester tene bon cuenta con den e mundo actual, mas y mas pensamentonan dudoso ta presenta den ambiente hubenil.
Hopi bez na tur pais y den tur ramo, ta topa cu hobennan cu ta kibra cu balornan importante ora nan mester habri paso pa drenta bida adulto pero ta topa cu sistemanan peligroso.
Estando den seno di familia nan por reacciona imediatamente pero den exterior nan ta depende hopi bez di hende desconoci cu a bira nan circulo social.
Studiantenan ta wordo prepara pa bay Hulanda pa bay forma nan futuro cu no ta depende solamente di conocemento den buki, pero tambe di conocemento di e sistemanan internacional cu demanda nobo.
Nan mester wordo prepara pa esaki y hasta mester ta posibel pa nan risibi conseho cerca miembronan di comunidad cu tabata parti di organisacionnan y estilonan di bida cu ta bira importante den e circulo social di un studiante.
