Lucha di trahadornan ta bira trampa di imperialistanan nobo --- *E pago di Stalin, Fidel Castro, Nicolas Maduro y Vladimir Putin --- *Un ola creciente di fugitivo ta produci “homber y muhe sin tera”
ORANJESTAD (AAN)- Solamente Pueblo ta salba Pueblo. Esaki ta e grito cu a wordo malusa dor di dictadornan cu na momento cu nan a nace, hamas por a pensa cu un dia nan por tin poder.
E “masa di homber y muhe sin tera” ta e obhetivo di dictadura disfrasa, cu ta abusa di hende cu ta lucha den bida pa nan alcansa nan proposito cu sudor di nan frente.
Si awe na tanto parti di mundo ta existi miedo pa accion sindical, ta debi na e cantidad di momentonan cu abuso a wordo haci di organisacion di hende dor di personanan sin capacidad pa sikiera representa nan mes, yega na poder.
Politica sigur a hunga un papel importante den loke ta pasa actualmente na mundo ya cu politiconan manipulador ta uza accionnan di otro pa nan por habri nan propio caminda y asina logra loke nan no por logra cu sudor di nan frente.
Loke a pasa awe na Rusia, na Ukraine, ta uno di e hopi storianan cu a bira un cadena di advertencia contra tur tipo di organisacion, cu ta uza hende pa yega na poder, cu solamente ta sirbi hende si e pianan cu ta carga “poder” ta fuerte riba nan mes.
Awe e crisis di Ukraine a yega na un momento cu ta splica kico ta traicion di e ser humano, cu ta pone su confiansa den hende, cu ta resulta di ta pio cu bestia.
Si, hende pio cu bestia, pasobra bestia ta ataca loke ta un menasa, loke ta deshaci di su hamber of ta menasa su neishi.
Pakico Vladimir Putin mester destrui Ukraine y e Pueblo di Ukraine?
No mester bay mucho leu pa topa cu e contesta.
Pakico Aruba tin miedo pa habri su frontera cu Venezuela? Pasobra e Pueblo di Venezuela ta consisti di hende cu merece rechazo?
No!
Tin lazonan familiar fuerte ta uni Venezuela, Colombia, region di Caribe. Si Aruba mester cera su portanan ta pa motibo di e peligro cu a wordo crea dor di abuso cu a wordo comete dor di Hugo Chavez y awe Nicolas Maduro den nos temponan moderno na un pais cu a conoce otro dictadornan prome cu nan.
Chavez y Maduro a priminti e Venezolano un Venezuela nobo, den cual e Venezolano a kere.
E crisisnan mundial di petroleo, e caida di Petro Dollar a bira fatal pa e pueblo di Venezuela cu tabata e turista cu region di Caribe tabata busca.
Tabata tin situacionnan cu mester a atende na Venezuela sin duda mescos cu na tur parti di mundo. Situacionnan cu a habri porta pa Chavez y despues pa Maduro.
Kico a pasa cu Venezuela? Venezolanonan a muri como fugitivo den botonan chikito. Venezolanonan mester a humilia nan mes pa por a sigui come, mescos cu un dia a pasa na Cuba, ora Fidel a bati na porta cu Rusia su tras.
2022 a trece e gran berdad di comunismo. Na Cuba, personanan cu a protesta contra comunismo, ta den prison.
Na Venezuela, Nicolas Maduro ta come cu forki y cuchio di oro y ta lubida e condicionnan di e trahadornan riba cual e ta trapa mientras forsanan di paisnan comunista y subversivo, ta domina su Pueblo.
Awe Pueblo di Ukraine, sin ningun motibo husto, a bira e “homber y muhe sin tera” pa cual comunismo supuestamente mester a bringa.
E mascara ta cay atrobe mientras hende ta bira victima di figuranan ambicioso, cu ta uza hamber di hende, pa nan haya poder den organisacionnan di diferente cualificacion pero cu un meta: uza hende inocente pa haya poder pa asina por trapa riba hende!
Awe refugiadonan ta bandoina Ukraine y ta laga atras tur nan pertenencia pero tambe otro prueba di e dobel cara di comunismo como dictadura perfecto di capitalismo, di centralisacion di placa y poder!
