ORANJESTAD (AAN): Diabierna mainta Hues di Corte di Husticia a confirma e exigencia di Fiscal y a condena e ex agente di Polis,
S., na 4 aña di prison di cual 4 luna ta condicional. Hues ta haya S. culpable cu entre Januari 2017 y Augustus 2021, a viola su pareha 3 biaha, a menaza pareha di su mama y a maltrata su mama.
RETIRA DI POLIS: Ta asina cu S. a wordo retira di Polis door cu e tin hopi problema di abuso di alcohol. Mando di Polis a duna S. chens pa e rehabilita pero e no a busca ayudo. Ta asina cu S. no ta di acuerdo cu el a wordo retira y a apela contra e decision di retiro di Polis.
FISCAL: Algun siman pasa tratamento di e caso a tuma lugar caminda Fiscal a bisa cu ta trata aki di un caso hopi serio. El a cuestiona e forma con e homber a viola diferente biaha su mesun pareha. Fiscal a splica cu normal a base di ley, e lo a exigi 5 aña y 6 luna di prison pero Fiscal a tene cuenta cu e raport di Reclassering cu ta mustra con lo por yuda S.
Fiscal a sigui splica cu segun ley, si e exigi un castigo mas cu 5 aña, no ta posibel pa S. haya ayudo. Teniendo tur esey na cuenta, el a exigi 4 aña di prison di cual 4 luna ta condicional cu 3 aña di prueba y bou guia di Reclassering. Fiscal a sigui bisa cu e no ta bay pidi pa prohibi S. papia cu su ex pasobra nan mester yega na un areglo pa S. tin contacto cu su yiu.
SENTENCIA: Hues riba Diabierna mainta, via video conference a dicta sentencia. E acusado S. tabata den un oficina na KIA mientras cu den sala di Corte tabata Hues, Fiscal y abogado mr. Mohamed.
Hues a bisa cu e ta haya legalmente proba cu S. a viola diferente biaha su mesun pareha, a menaza e pareha di su mama y a maltrata su mesun mama. Hues ta haya e castigo exigi pa Fiscal na su lugar. El a condena S. na 4 aña di prison di cual 4 luna ta condicional cu un tempo di prueba di 3 aña. Durante e tempo di prueba, S. mester ta bou guia di Reclassering y mester sigui tur indicacion di Reclasering. Hasta si esaki ta cu S. mester sigui rehabilitacion di adiccion y tratamento psicologico.
