ORANJESTAD (AAN) – Minister di Enseñanza y Deporte, Endy Croes, den conferencia di prensa di gobierno Diabierna mainta,
a bisa cu e tambe ta sostene e programa cu a wordo lanza pa su colega Minister Dangui Oduber, en conexion cu Dia Internacional di Concientizacion riba Obesidad.
E mandatario a señala cu obesidad ta causa problemanan fisico y otro efectonan, por ehemplo pa salud mental.
Croes a bisa cu como gobierno y como departamentonan encarga, lo pone atencion pa concientiza henter nos pueblo, durante henter e luna di Maart y kizas hasta henter e aña, pa biba mas saludable.
E dignatario a bisa cu obesidad ta causa diabetes y problema di curazon, cu ta costa gobierno hopi placa pa atende e pashentnan, y ta miho pa concientiza pueblo, pa por preveni tur esaki.
El a referi na IBiSA (Instituto Biba Saludable y Activo) su campaña di midimento di cintura, cu a wordo lanza diabierna 4 di Maart aki, unda tin un video pa educa pueblo den esaki, y cu e mandatario ta spera cu mayornan tambe por dedica tempo na instrui nan yiunan, con pa haci uso corectamente di e campaña aki, y concientiza nan grandinan tambe cu esaki.
E mandatario a menciona cual lo ta e contribucion di su ministerio di deporte, pa bringa obesidad atravez di movecion y deporte. Den articulo apart por tuma nota di e programanan den practica y na caminda.
