Manera DIARIO a anuncia na 2023 cuminda a bira problema
*Protestanan di campesinonan ta rementa na Hulanda tambe
*Den porta di Cuaresma produccion di pesca mundial ta noticia
ORANJESTAD (AAN) — Uno di e topiconan mas importante cu DIARIO a lanza na 2023, tabata relaciona cu e forma cu cambio di clima lo tin impacto riba produccion di cuminda.
Loke esaki lo significa pa e industrianan di cria, pesca y agricultura a wordo trece dilanti pa informacionnan, cu awor ta wordo confirma pa situacionnan sumamente serio cu ta surgi den produccion di cuminda na mundo.
Mientras protestanan, cu ta haya caracter violento, ta rementa rond mundo, DIARIO a tuma nota di e informacionnan di siman pasa di United Nations Conference on Trade and Development, UNCTAD, cu ta e organisacion di Nacionnan Uni cu ta atende cu comercio y desaroyo.
Uno di e problemanan grandi cu e produccion di cuminda y den esaki tambe pesca ta confronta, ta e hecho cu e ta depende den mundo moderno di combustibel, cu ta afecta e condicionnan di oceanonan, loke ta nifica inversionnan nobo pa ahusta barconan cu ta wordo uza pa peskeria y e sistemanan cu ta wordo aplica pa laman entrega cuminda na hende.
Segun UNCTAD na forma urgente mester bini cu reglanan nobo pa e barconan di pesca, cu ta haci uzo di combustibel cu ta peligroso pa medio ambiente.
Tin embarcacion chikito of cu ta cay solamente bou cierto reglanan y ta peligroso den e cambio di clima.
Manera a bini dilanti awor, mayoria di e productornan mas grandi di pesca, no ta duna prueba di tin un compromiso relaciona cu e cambio di clima.
Mientras den mundo di pesca ta en busca di reglamentonan cu lo afecta participantenan den pesca pero tambe nan produccion pa mundo, noticianan alarmante ta yena mundo, cu ya den e Guera na Medio Oriente ta mira un problema serio pa productonan di alimento alcansa e consumidor si barconan mester biaha den e zona di guera.
E ultimo problemanan aki no ta mishi directamente riba termino corto cu Aruba, cu sinembargo, ta depende di produccion agricola, pesca y cria importa como base di alimentacion pa poblacion.
Den porta di Cuaresma 2024, informacionnan internacional riba tereno di produccion di cuminda, ta mustra riba e desaroyonan den e mundo di pesca, cu ta confirma e impacto cu cambio di clima tin riba prijs di pisca y otro cuminda produci pa laman.
Rapportnan oficial ta papia di e situacion financiero di participantenan na e mundo di pesca comercial internacional.
A wordo calcula cu pa 2050, e entrada di e grupo aki lo a baha cu 35 porciento debi na medidanan cu lo tuma pa confronta cambio di clima, pero aparentemente e perdida financiero den mundo di pesca, lo ta mucho mas halto, loke lo sigui afecta prijs di pisca y otro cuminda cu ta producto di laman.
Por spera pues cu prijs di pisca lo sigui subi mientras cu diferente pais ta duna asistencia special na piscadornan y tambe na productonan agricula y di cria.
Mientrastanto na Europa y Hulanda, accionnan pisa ta e resultado di plannan pa baha e sushi cu ta produci den e sector di cria, cu a ricibi asistencia di estado pa por baha e peliger cu e sushi di animal ta forma pa clima.
DIARIO riba e punto aki tambe a informa Aruba debidamente na 2023 y a adverti pa problemanan serio cu por spera di parti di campesinonan.
Informacion di accionnan violento na Belgica y na Hulanda, ta duna indicacionnan serio cu na Aruba mester cuminsa papia di e tema cu DIARIO a aborda for di 2023, debi na e forma cu aumento di prijs di cuminda y medidanan cu ta wordo tuma actualmente den mundo di cria, lo afecta tambe e prijs di cuminda cu ta wordo producti pa agritultornan y den sector di cria.
Informantenan di DIARIO a indica, cu mester ta prepara pa aumento importante di prijs di cuminda debi na e medidanan cu mester wordo tuma ariba tereno di produccion.
Mientras na Hulanda campesinonan a drenta accion y ayera na ciere di e edicion aki tabata confronta Polis cu tabata trata na pone fin na candelanan grandi cu tabata wordo cendi dor di organisacionnan di campesinonan, informantenan ayera a mustra DIARIO, cu prijs di productonan di pesca lo sigui subi na entrada di Cuaresma.
