Tur e cambionan cu gobierno nobo lo trece ta pa Aruba progresa y no pa bay atras

ORANJESTAD (AAN) – Asociacion Cuerpo Consular Aruba (ACCA) tambe a forma parti di e stakeholders invita pa reuni cu Formador Evelyn Wever Croes.

E Presidente di ACCA Carlos Andre Augusto, a hiba palabra den conferencia di prensa, posteriormente na e reunion, y el a expresa cu nan a representa tur e Consuladonan acredita na Aruba.

Consul Augusto a menciona cu tambe tabata  presente e Vicepresidente di ACCA cu ta señora Cecilia Arends, Consul honorario di Costa Rica, y señor Christian Mongelas, Consul honorario di Francia.

Durante e reunion cu Formador nan a informa Formador y su team pa nan tin un idea general den kico ACCA por coopera y kico tin di haber mas tanto cu e concern y e populacion stranhero na Aruba cu ta wordo representa pa nan consulado concerni. Consul Augusto a expresa cu e reunion a bay hopi bon, e tabata sumamente productivo, y a tuma nota di aspectonan cu semper ta trece inkietud ora tin cambio sea di gobierno, hefe, of departamento.

E presidente di ACCA a expresa cu awo Aruba ta den proceso di formacion di un gobierno nobo y tur e cambionan cu ta bay bin ta pa progresa, pa mehora, y ningun hende ta haci un cambio pa bay atras.

Consul Augusto a enfatiza riba e hecho cu ainda nos ta den e pandemia, ainda tin covid-19 na mundo, pues nos ta den un situacion delicado.

El a agrega cu e ta sinti cu e proceso di formacion ta bayendo basta bon; e integracion di e partidonan pa e coalicion ta perfecto, den bon entendimento y ACCA ta na expectativa di e carteranan cu ta bin ta bay ta hopi bon prepara y manera semper, gobierno ta tuma precaucion cu medidanan pa mehora Pais Aruba, y, consecuentemente, na bienestar di tur nos ciudadanonan local y stranhero. E ta convenci cu nos pueblo lo haya sosten di e gobierno nobo.