ORANJESTAD (AAN): Awor cu mas y mas futuro generacion ta pushando pa tur hende cuminza usa menos vehiculo di motor usando combustible,
y bay mas pa esnan cu ta traha ‘green’, pues sea di bateria of djis cu musculo humano, bo ta haya hendenan ta usando mas bicicleta pa move di punto A pa punto B.
E ta un bon idea, pero algun biaha caba por a lesa comentario di varios ciclista cu na Aruba nan no ta haya e respet necesario ora di core riba caya. Specialmente Trucknan grandi ta pasa banda di nan y no ta ni duna nan e minimo di espacio pa core.
Pero di otro banda, bo ta haya automobilistanan tambe ta keha cu ciclistanan no ta cumpli cu regla, y envez di core uno tras di otro, ta core banda di otro riba caya.
E siman aki DIARIO a ricibi e potret aki di un lector, kende no ta di acuerdo cu ciclistanan ta usa cualkier palo di luz, of palo di borchi pa para y mara nan bicicleta. E ta haya cu esaki ta “mahos” y tambe cu e ta “stroba peaton”.
Pero aparentemente na Aruba no tin ningun regla encuanto stacionamento di bicicleta. Parce cu na Hulanda tambe ta mesun cos, pues no tin regla. Pero cada Gemeente (alcaldia) tin poder pa stipula y bin cu nan mesun regla.
Pero na Aruba, loke e persona a haci aki no ta contra ningun regla, y ademas e ta sigura cu su bicicleta tey unda cu el a lage na final di su horario di trabao.
