ORANJESTAD (AAN): Diamars 18 di juli, Minister Geoffrey Wever a keda cla cu e parti huridico y financiero pa por soluciona e problemanan di riolering bou di tera.
Despues cu a cuminsa cu e trabounan di e prome fase di revitalisacion na Columbusstraat y Wilhelminastraat. Na April ultimo e trabounan di embeyecimento di e area mester a para abruptamente debi cu DOW a encontra e red di riool cu ta core bou di caminda den un mal estado cu mester a atende esaki dibiaha unda na mes momento trabounan tabata andando ariba e futuro plaza na Columbusstraat.
Durante di e inspeccion riguroso a bin constata cu e “bakprofiel” cu ta fungi como canal pa hiba awa di yobida, tabatin varios problema. E “bakprofiel” tabata uno hopi bieuw y den mal estado. Inicialmente, a considera, pa mientrastanto habri caminda pa trafico, pero e caminda lamentablemente no por a wordo habri pa auto mirando cu e red di “bakprofiel” cu ta core bou henter e caminda di Columbusstraat. Esaki no por a wanta e peso di auto y lo ta un peliger pa nos automobilistanan. A opta e ora pa mantene e caminda cera mientrastanto cu trabounan ta sigui ariba e plaza. Despues di a analisa diferente posibel solucionnan a opta pa un sistema mas duradero y cu tin un periodo mas corto di construction pa soluciona e problema mas lihe posibel.
“Nos ta lamenta cu e trabounan na Colombusstraat a haya retraso, lamentablemente esaki no tabata den nos man y door cu e sistema bieuw bou di tera ta kibra , nos a haci nos maximo empeño pa remedia e situacion bou di tera pa asina e proyecto por sigui. Nos sa cu e comerciantenan tin'e dificil, specialmente cu e retraso y nos ta disculpa nos mes pa esaki. Awo cu tur cos ta cla cu e trabow nan bou tera, por sigui. Segun e estimacion di e contratista den 8 siman Columbusstraat y parti di Wilhelminastraat por ser entrega.”
