ORANJESTAD (AAN) – Errol De Freitas, Presidente di San Nicolas Business Association (SNBA), a señala den entrevista cu DIARIO,
cu si e desaroyadornan di Secrets Hotel perde smaak, e por imagina su mes kico Aruba ta bay keda colga riba su cabes financieramente, y kico otro mester warda pa desaroya San Nicolas.
De Freitas a bisa cu tin hopi inversionista cumprando na San Nicolas caba, y mester keda cu e animo aki di pusha esaki.
E ta haci un yamada na gobierno, na prome lugar pa continua cu e proyecto aki, y ta pidi e abogadonan di Secrets, pa pone tur cos riba un linea y keda cla cu esaki mesora, cu por tin e continuacion di e hotel aki.
Den pasado tabata tin proyecto cu tambe a wordo para na San Nicolas y despues di dos aña nan a cansa y bay. Pero, segun De Freitas, Secrets tin un “spin off” hopi bon pa San Nicolas y e ta bay capta atencion di hopi otro negoshi cu lo sigui lanta na San Nicolas.
De Freitas ta pidi atencion di pueblo pa accion di firma, cu ta cuminzando y nan lo bay na e propiedad y ta bay indica na unda e ciudadanonan por pasa firma. Dialuna otro siman e accion di firma ta inicia, cu ta un proceso digital cu ta yega na pueblo, pero tin otro organizacionnan deportivo, religioso y social cu ta participando den e accion aki.
De Freitas ta spera cu prome cu e cumbre, den un tempo relativamente corto, por mustra loke SNBA y e pueblo pariba di brug kier pa San Nicolas.
Ora cu tin un accion di firma tin un parti legal den dje, y SNBA lo sigura su mes cu tur esaki lo wordo cubri. Riba pagina di facebook di SNBA lo anuncia tur informacion, y ora di lanza e accion lo convoca un rueda di prensa pa introduci esaki oficialmente, na unda e ciudadanonan por yega.
