Tur atleta Olympico a ricibi e smartphone di mas nobo di Samsung

Galaxy Z Flip6 Olympic Edition

PARIS: Tur atleta Olympico ora cu nan a yega den nan camber, a bin ricibi riba nan cama un “pakete di bon bini” cu tur reglamento, y tambe algun regalo.  Ademas di boter di awa, etc., nan a bin topa tambe cu un cahita di Samsung color preto, cu letternan di oro.

   A resulta cu tur atleta a caba di haya un costoso smartphone Galaxy Z Flip6 di Samsung, color di oro, cu simbolo Olympico parti patras.

   Esaki a bira un sorpresa hopi agradable pa hopi atleta, pa nan tin un aparato asina nobo y exclusivo den nan man.  Ora di cende e smartphone aki cu ta habri y bira un smartphone largo, y cu tin un pantaya extra banda pafo tambe, un mensahe di “Dear Olympians...” cu ta duna nan bon bini na e Weganan Olympico y Paralimpico Paris 2024.

    Samsung di e forma aki a divulga e exclusivo Galaxy Z Flip6 Olympic Edition, pa asina atletanan por usa e smartphone awor cu nan ta na Paris y despues na nan pais.  Cada uno a bin cu un eSIM di 100 GB data riba 5G network pa nan usa na Francia.

   E regalo aki a wordo diseña y prepara special pa e atletanan aki.  E ta e prome Olympic Edition smartphone cu tin Galaxy AI.  El a bira prome biaha cu e producto di mas nobo di Samsung ta wordo ofreci na atletanan prome cu el a wordo lanza oficialmente pa benta rond mundo.

   Un total di 17.000 smartphone Olympic Edition yena cu app special pa Olympiada, lo bay mehora e experiencia di e atletanan durante e competencianan Olympico.  Tin app tambe pa nan por usa transporte publico sin limite, pa por move tur caminda.

   Mesora riba social media, ta  cantidad di atleta a cuminsa graba video di e smartphone fenomenal aki cu nan a ricibi como regalo.