Edward Maduro, lider SADA ta splica:
- Ta Aduana tin acceso na e camaranan di seguridad
ORANJESTAD (AAN) Presidente di Sindicato SADA, señor Edward Maduro, den entrevista cu Matutino DIARIO a señala cu, enberdad, Triple A ta esun cu ta maneha e edificio completo di Aeropuerto, pero Aduana tin camaranan unda nan ta warda carga, sea di pasahero of comerciantenan, pero Aeropuerto no tin acceso na esakinan.
“Y no mester bay mas leu, pasobra nos ta compronde for di nos coleganan cu ta traha na aeropuerto, nan a bay tira un bista y manera nos tur sa, nos tin un US Pre-Clearance na Aruba, y locual nan por a constata, ta no tin camara unda cu Aduana Mericano ta eherce su control. Nan no tin mes! Locual nan a confirma y asegura na nos ta cu den e parti unda US ta haci su control no tin camara, ni unda ta controla e paspoortnan, ni unda nan ta controla e maletanan di pasahero. Nan tin un localidad den full privacidad unda no tin acceso na camara te unda cu nos sa”, segun Edward Maduro a señala.
El a comenta cu e no sa con e sistema ta na aeropuerto na Curacao, si tin camara of no, pero si tin, e ta sigur cu no ta den man di tercer persona. “Con cu bay bin security di Triple A no ta ambtenaarnan huramenta, den e sentido como Douane Ambtenaarnan, por ehemplo, cu ta huramenta pa haci controlnan di maleta. No ta ken cu ta, no ta cualkier ambtenaar por yega bisa un pasahero pa habri su maleta p’e control’e. Hasta, si bo ta den un onderzoek, Polis no por yega habri maleta di un pasahero cu ta drenta na Aruba”, Maduro a señala.
El a remarca cu mester ta cauteloso pasobra nan tin un reglamento pa tur hende ta riba mesun linea pa no tin cruzamento y pa cosnan no corecto no sosode.
Edward Maduro sa cu e director di Aduana ta na haltura di esaki, pero el a comenta cu ora un director ta actua corecto e lo a haci algo, pero segun su palabranan, e sindicato ta custumbra caba cu señor Croes ta sconde informacion “Y na ultimo ora ta yega pone y bisa cu e ta manda akinan y ningun hende tin nada di bisa. Y esey ta loke nos ta lamenta pasobra ta cosnan cu nos a splica e Minister, pero si acaso e no ta kere e sindicato cu ta representa e miembronan, mester bisa nos ‘sorry, mi ta confia mas den e palabranan di e director’. Pero e minister ta na haltura di e situacion cu ta reinando den e Cuerpo di Aduana en relacion cu e director. Dus, si e kier a duna un comentario mas neutral y balansa, e lo por a acerca sindicato cu ta representa e miembronan di aeropuerto pa haya sa kico ta e hechonan cu nan tin”, Edward Maduro, lider sindical di SADA a señala.
