ORANJESTAD (AAN): Un lista cu e popular website di Tripadvisor a publica, consistiendo di restaurantnan for di rond mundo, a logra di inclui un restaurant di Aruba tambe den dje, y pa colmo e ta poni na posicion number 2.
Tripadvisor a prepara un lista di e 20 mihor restaurantnan rond mundo como lugar pa “Best Date Night”, a pone un establecimento di Aruba den e top 5.
Ta trata aki di Elements Restaurant, cu ta situa na Bucuti & Tara Beach Resort cerca di Punta Brabo.
Lo mihor, ta cu nan a sali como e number 2 na Mundo pa parehanan enamora, Elements tambe ta e unico restaurant Caribense pa a gana e Travelers’ Choice Award pa aña 2021 den e categoria aki.
Segun Tripadvisor a revela cu ganadornan manera Elements sa con pa “crea un ambiente sumamente romantico pa un mesa pa dos”. Tripadvisor a comparti e reseña di un huesped unda e ta describi Elements como “e lugar di mas romantico na mundo pa come. E waiter tabata magico, leuk y perfeccionista. E platonan tabata elegante, sabroso y simplemente perfecto.”
Elements den su elemento: Esaki ta loke e Executive Chef Marc Giesbers a comenta: “Nos clientenan cu ta bin pa ‘date night’ ta descubri un mezcla harmonosio di romanticismo y naturalesa na e restaurant situa na Eagle Beach, conoci como un di “Dream Beaches of the World”.
“Tur dia na Elements nos tin e absoluto placer di ta testigonan di con amor, romanticismo y trankilidad ta radia di nos clientenan,” Director di Food & Beverage y Executive Chef Marc Giesbers ta conta. “Nos ta hopi agradecido cu nos esfuerzonan a worde reconoci cu un Tripadvisor 2021 Travelers’ Choice Award pa ‘Top Date Night’ na Mundo.
