ORANJESTAD (AAN): E siman aki, Banco Central di Aruba a publica nan relato mensual di Mei 2021.
Compara cu april 2021, e cantidad di placa den circulacion a crece cu Afl. 46,8 miyon te na Afl. 4.984,5 miyon den e luna di mei 2021. Esaki a resulta for di un subida den e reserva di divisa netto (+Afl. 51,2 miyon) y un caida den reserva activo domestico netto (-Afl. 4,4 miyon).
Na mei 2021, e reserva di divisa netto a expande, esaki a worde causa pa compra netto di divisa di Afl 226,3 miyon di publico, principalmente relaciona cu entrada for di turismo y cu transferencia netto di cuentanan den exterior di companianan local.
Esaki a worde pa un gran parti mitiga pa benta netto di divisa di Afl. 175,0 miyon na publico, primordialmente relaciona cu pago pa importacion y otro servicionan.
E caida den e activo domestico netto a worde causa pa un bahada den credito domestico (-Afl. 5,9 miyon), mientras cu transaccionnan no relata na credito a experiencia un subida (+Afl. 1,5 miyon).
E caida den credito domestico a resulta for di un bahada den credito bancario na e sector priva (-Afl. 8,9 miyon) y un subida den credito bancario netto na e sector publico (-Afl. 3,0 miyon).
E bahada den credito bancario na e sector priva a worde causa pa menos credito na empresa (-Afl. 5,8 miyon), credito na consumidor (-Afl. 3,0 miyon), y hipoteca pa vivienda (-Afl. 0.2).
E subida den credito bancario netto na e sector publico ta worde atribui na menos deposito di gobierno (-Afl. 23,0 miyon) y credito bruto na gobierno (-Afl. 19,9 miyon).
Inflacion: E nivel general di prijs, cu ta worde midi door di e indice di prijs di consumo, a registra un bahada di 0,2 porciento den e luna di mei 2021, compara cu 0.4 den april 2021.
E contribuyentenan principal na e caida aki tabata e categorianan “mobilario” y “recreaccion y cultura”. Pa loke ta trata e promedio anual di e tasa di inflacion, esaki a registra -2,2 porciento na mei 2021, compara cu -2,3 porciento na april 2021.
Entrada total di gobierno a suma Afl. 98,8 miyon na mei 2021, cual ta Afl. 30,4 miyon menos cu e mesun luna di e aña anterior. Esaki a resulta for di un aumento den entrada di impuesto (+Afl. 31,8 miyon), y un bahada den entrada no relata na impuesto (-Afl. 1,4 miyon)
E contribuyentenan principal na e expansion den entrada di impuesto ta subidanan den impuesto riba importacion (+Afl. 8,0 miyon), e asina yama “turnover tax” (B.B.O./B.A.V.P.) (+Afl. 6,7 miyon), impuesto riba gasolin (+Afl. 2,8 miyon), impuesto riba ganashi (+Afl. 2,4 miyon) y impuesto riba alcohol (+Afl. 2,2 miyon).
E bahada den entrada no relata na impuesto a worde causa pa un bahada den otro entrada no relata na impuesto di Afl. 1,4 miyon.
Turismo: Aruba no a ricibi turista na mei 2020, pa es motibo e cifranan pa turismo di mei 2021 a worde compara cu e cantidad di turista cu a bishita nos isla na mei 2019.
Na mei 2021, e cantidad di turista a registra 70.683 turista, cual ta 17.860 menos bishitante (-20,2 porciento) compara cu na mei 2019. E mercado Latino Americano, Norte Americano y Europeo a baha cu 6.968 bishitante (-79,7 porciento), 6.801 bishitante (-9,7 porciento), y 4.248 bishitante (-58,2 porciento), respectivamente.
E bahadanan a worde causa door di menos bishante for di tur pais den cada mercado.
