Responsabilidad propio ta haya un nificacion mas grandi na 2021 - *Vacuna ta bira esencial pa studiantenan Arubano cu ta bay Hulanda
ORANJESTAD (AAN) — Un topico local y internacional na e momentonan aki ta e hecho cu henter mundo kier bandona limitacionnan di Covid-19 mas pronto posibel.
Mientras e variante Delta a demostra di ta sumamente peligroso, viaheronan ta asumi un responsabilidad cada dia mas grandi pa nan mes.
Esaki sigur ta e caso pa e grupo di hobennan Arubano cu ta prepara pa bay studia na Hulanda, cu ta e pais cu anualmente ta mira un grupo di hobennan di Aruba ta bula pa Europa pa asina habri porta pa nan futuro.
Na 2020 cantidad di medida a wordo tuma y tabata tin mucho mas atencion directo pa e peliger di Covid-19, cu a conoce diferente desaroyo na 2021.
Uno di e desaroyonan aki ta sigur e hecho cu e vacuna a wordo introduci y cu posibilidad a habri pa tur hende busca e proteccion pa nan mes y asina pa otronan.
Na Europa actualmente hustamente e pasonan cu ta wordo tuma pa preveni e coronavirus nobo sigui plama, ta cera porta pa personanan cu no ta vacuna. Debi na leynan cu ta regla e derecho di personanan pa dicidi pa nan mes, na Europa tin basta disturbio contra e forma cu personanan cu ta nenga di vacuna, na un forma silencioso no tin mes oportunidad cu personanan cu a vacuna.
Pa studiantenan esaki ta bira un punto sigur debi na e hecho, cu vacuna ta bira parti di responsabilidad propio tambe cu mas y mas instancia ta exigi pa nan por alcansa e normal nobo.
Gobierno di Hulanda a bolbe haci un apelacion na Universidadnan despues di entrada di e variante Delta, pa nan tene consideracion cu Covid-19. E contesta di Universidadnan tabata cu nan habri den un ambiente di normalidad loke ta nifica cu nan no ta cambia horario y no ta bay tene nan mes na distancia social, pa cual mayoria di e institutonan no ta ekipa.
Ta wordo spera cu despues di Universidadnan, otro instutonan educacional tambe ta sigui e norma di Universidadnan cu ta habri nan porta pa e temporada academico 2021- 2022 cu regreso na loke tabata normalidad.
Pa studiantenan esaki ta nifica cu nan mes mester cuida nan mes. Universidadnan a bisa cu nan lo por haci testnan, pero na mes momento a indica cu nan no ta e establecimentonan cu por mantene trabou extra pa sigui haci test ni schedulenan cu ta afecta nan personal entre otro pero tambe esnan responsabel pa horarionan di nan instituto.
Mester bisa cu studiantenan cu ta bay Hulanda, mester tene na consideracion cu vacuna ta bira nan proteccion mas grandi den un sistema cu ta mas peligroso pa studiantenan cu pa turista por ehempel. E studiante ta haya su mes den mas contacto personal pa entre otro su acomodacion, cu hopi biaha ta nifica espacionan cu mester comparti cu otro hende.
Pa tur studiante cu ta bay exterior na e momentonan aki ta conta, cu nan mester cuida nan mes cu e variante cu ta ataca hobennan y cu ta plama cu rapidez enorme na Europa y na Merca entre otro.
DIARIO ta den contacto cu informantenan pa por brinda tur informacion na personanan y sigur studiantenan cu ta biaha pa exterior pero e ultimo palabra ta keda na cada persona den un mundo cu un peliger mas grandi awor pa Covid-19 pero cu menos regla oficial cu tabata e caso na 2021. Mientrastanto si ta asina, cu na forma inoficial entre otro empresanan ta cuida nan mes di aumenta nan cantidad di empleado cu por haya e malesa y asina bira un peso pa nan.
