Trinta aña colaboracion entre Merca y Hulanda den operacionnan contra traficacion di droga

Barco patruyero Zr.Ms. Groningen a regresa Caribe

ORANJESTAD (AAN): Informacion for di Curaçao ta indica cu abordo di e barco Zr.Ms. Groningen e siman aki, a celebra un hecho memorabel importante: Esey ta hubileo 30 aña di colaboracion estrecho entre Merca y Hulanda riba tereno di lucha contra traficacion di droga den Region Caribense.

   E hubileo a tuma lugar na Key West, Florida, na unda e sede di “Joint Inter Agency Taskforce South (JIATF-S)’ ta situa.

   JIATF-S ta un organizacion unico internacional, guia pa Merca, cu ta trece hunto 19 pais y organizacion, tal manera FBI y DEA, den e lucha contra criminalidad rond di droga den Region Caribe. Marina Real ta hunga un rol crucial den e organizacion guia pa Merca. Hulanda ya pa 30 aña ta forma Task Group 4.4 y ta provee diferente unidad pa operacionnan anti-droga.

   Como Comandante di Forsanan Naval den Region Caribe Hulandes (C-ZMCARIB), Comandeur Walter Hansen ta guia e grupo di tarea.

   Comandeur Hansen a describi e colaboracion intensivo como un “bon matrimonio”, den cua e hubileo di 30 aña ta marca un hecho memorabel importante.

   “Transito di droga ta un problema complica cu ta rekeri un enfoke internacional”, Comandeur Hansen a declara.
   E regreso di Zr.Ms. Groningen den Region Caribe Hulandes ta simboliza e compromiso di Hulanda den e lucha contra traficacion di droga y criminalidad transfronteriso. Asina Defensa ta contribui na paz y seguridad den Region Caribe Hulandes.