Jeffrey Matos di Centro Kibrahacha ta satisfecho
* Proyecto 125 celebrando su prome aniversario
ORANJESTAD (AAN): Diamars atardi a tuma lugar na Centro Kibrahacha na Piedra Plat un ceremonia special pa conmemora algo special.
Jeffrey Matos kende ta director di Centro Kibrahacha, a splica cu e celebracion ta den cuadro di e prome aniversario di Proyecto 125, cu ta encera e liña di telefon 125 cu ta specialmente dirigi pa yuda Adultonan Mayor.
Proyecto 125 a bira realidad bek atrobe danki na colaboracion intenso entre Gobierno, Setar NV, y mas stakeholder cu a yuda pa pone un biaha mas riba pia.
Proyecto 125 originalmente a start durante Pandemia di Covid-19 na 2020, y tabata un plan original pa asina laga e adultonan mayor keda den contacto y no sinti nan mes solitario. E periodo ey tabata uno cortico, sinembargo e resultado cu a wordo duna, a mustra claramente cu na Aruba tin necesidad pa adultonan mayor tin un hende pa combersa cu nan.
Asina a traha pa haci esaki algo formal den forma di un proyecto, y a presenta esaki na Gobierno. El a wordo acepta inmediatamente door di Gobierno, y asina a cuminza cana pa start cu esaki.
E sede di e Proyecto 125, cu su number di telefon 125, a bira na Centro Kibrahacha mes. Pues nan a amplia e oficina unda e boluntarionan por sinta. Di e forma ey e proyecto a cuminsa draai cu un coordinador, y un crew di 13 boluntario kendenan ta asisti pa cu e yamadanan. Segun Matos, den un aña di tempo a logra di acumula hopi dato.
Resultadonan positivo: Uno di nan ta cu a bin realiza cu tin un gran variedad di necesidadnan cu adultonan mayor na Aruba tin mester ampliamente di dje. Aki e parti di famia, y e contacto ta primordial. Esey ta algo cu na Centro Kibrahacha ya di hopi tempo caba nan a bin ta notando esey. Mayoria biaha esnan cu tur dia ta bay Centro Kibrahacha, ta esnan cu en general ta den bon estado di salud, pero ta importante pa den e fase ey caba bo tin un bon contacto cu famianan. Pasobra ora cu e adultonan mayor aki drenta den un otro fase di bida, ta importante pa tin bon palabracion y plan con pa atende cu esey.
Via di telefon tambe na varios ocasion, a bin tuma nota cu enberdad nos grandinan ta den soledad, y nan ta busca conexion pa nan “papia cu hende” y por haya yudansa, guia, y informacion cu nan tin mester.
Yamada di 95 minuut largo: Loke Proyecto 125 a produci ta resultadonan positivo. Jeffrey Matos ta extremadamente contento cu esey. El a bisa cu pa maneho di Centro Kibrahacha, semper ‘data’ ta importante, y danki na Liña 125 awor nan tin hopi informacion balioso, riba detaye en general di adultonan mayor.
Recien tur stakeholder a reuni riba e datonan aki produci pa Liña 125, y analisando tur cifra, a bin descubri cu un di e yamadanan cu a wordo haci a dura un total di 95 minuut. Pues pa mas di 1 ora y mey, un boluntario a keda atende un adulto mayor riba su asuntonan.
Segun Jeffrey Matos, e yamadanan di 95 minuut no ta un promedio, pero djis uno specifico cu a bay basta largo. E ta dunabo indicacion con grandi e necesidad pa nos grandinan pa nan ta den comunicacion cu otro persona.
Liña 125 ta duna servicio den oranan di mainta, y ta haya promedio di 5 pa 6 yamada. Pero awor Gobierno a caba di anuncia cu ta bay expande horario di yamadanan for di mainta te atardi, y esaki sigur ta un bon noticia.
Durante e prome aniversario di operacion, tabatin varios cos dushi pa asina invitadonan a goza y sinti nan special. Entre esnan presente tabata Ministro Presidente Evelyn Wever-Croes, y Ministro Ursell Arends.
