PORT OF SPAIN: Tres persona cu ta ruman di otro, a wordo deteni ora cu nan a yega Trinidad & Tobago.
E hobennan aki tabata hunto cu nan mama y nan tabata abordo di un boto cu a yega di forma ilegal na e pais.
E hobennan ta pertenece na e Orquesta Sinfonica di Nueva Esparta. E informacion aki a wordo denuncia awor door di tata di e hobennan, kende a bisa cu su yiunan a wordo deteni Diabierna 24 di December na Trinidad & Tobago.
Jose Herrera a bisa cu su tres yiunan, Michelle di 18 aña hunto cu su dos ruman hombernan menor di edad, a wordo deteni ora cu nan a yega e isla Caribense.
El a agrega, cu na comienzo e hobennan aki y nan mama a wordo deteni na e zona di Cedros (Trinidad), unda despues a hiba nan pa un centro di salud na Siparia. Di eynan a wordo hiba pa e base naval di Chaguaramas.
Herrera a añadi cu el a logra mira e tres hobennan na Siparia, pero e tabata djis un ora so cu nan, pasobra despues nan a wordo traslada pa Chaguaramas.
E tres hobennan aki recien a participa den un evento pa kibra e record mundial di e Orquesta mas grandi di Mundo. Un total di 12.000 musico di diferente parti di Venezuela a reuni pa asina toca e Slave March di Piotr Tchaikovsky. Riba e potret aki por mira nan cu e T-Shirt conmemorando e logro den e Guinness Book of World Records aki.
