E por pone prijs di gasolin subi aki seis siman
HOUSTON: Un candela na un refineria di ExxonMobil na Texas, cu ta un di esnan mas grandi na Merca, a laga cuatro herido, segun autoridadnan local a informa.
E candela a cuminza banda di 1’or di madruga na ExxonMobil Chemical Plant na pueblo di Baytown, cu ta como 40 kilometer pariba di Houston.
Sheriff di Harris County a describi e candela na Baytown como un “accident industrial grandi”, y e hefe di e unidad policial, Ed Gonzalez a indica cu e prome investigacion ta mustra cu un sorto di explosion a socede den e planta.
Segun Gonzalez, tres di esnan herida a wordo transporta pa Hospital cu helicopter y uno di nan den ambulans.
Tur e heridonan ta stabil, segun e Hefe di Refineria di ExxonMobil, esta Rohan Davis a bisa durante un conferencia di prensa duna eybanda mes. Segun Davis, no tabatin morto y e resto di personal a wordo localiza.
Segun Davis a bisa, ExxonMobil ta haciendo awor test cu e calidad di aire debi na e candela, y no a detecta ningun problema, y pesey mes autoridadnan no a pidi habitantenan di e area eybanda pa bandona nan cas.
“Nos ta lamenta profundamente e molester, e accident y e inconveniencia cu el a causa comunidad,” Davis a bisa.
Habitantenan den e area a bisa e canal KHOU-TV cu nan a sinti con nan casnan a tembla ora cu e explosion a tuma lugar. Na comienzo nan a kere cu ta un temblor ta pasando.
Canalnan di TV local a mustra hopi imagen di e vlamnan grandi cu tabata sali di e refineria, unda diferente unidad di Cuerpo di Bombero a traha largo pa paga e candela.
ExxonMobil su instalacionnan na Baytown ta consisti di un Chemical Plant, otro planta pa procesa Olefins, y un refineria di petroleo, cu ta e di cuatro mas grandi di Merca y cu un capacidad pa procesa 560.500 bari pa dia. Den full e refinerianan aki tin 7.000 empleado.
Por hisa prijs di gasolin: Mientras tanto e candela aki, lo por yuda pusha prijs di gasolin na Merca pa bay riba di $4 pa galon. Pasobra ExxonMobil a confirma cu e explosion y candela a afecta parti di e produccion di gasolin na e planta.
E impacto aki lo por wordo sinti aki seis siman. Tur esaki debi cu no ta tur sistema di produccion di Gasolin lo ta online na e refineria pa posiblemente un cuartal. Esey ta loke Tom Kloza a bisa, kende ta chief oil analyst di Oil Price Information Service.
Aworaki prijs di gasolin na Merca ta na promedio di $3,29 y e explosion aki lo por pone yega na $4,00.
