Decision di Conseho Electoral a pone fin na protesta -ORANJESTAD (AAN): Diaranson mainta mientras cu Conseho Electoral tabata reuniendo pa atende cu e tema di e reconteo di votonan,
pafo di Registro Civil y Censo un grupo grandi cu ta sostene partido AVP y algun otro partido chikito a aglomera pafo di e edificio pa protesta.
Rene Herde di Partido AVP a alega cu for di cuminsamento di e campaña politico tabata tin violacion di e ley di eleccion. El a menciona e asunto di rijbewijs, uzo di scanner, y cu esaki tabata contra ley.
El a bisa cu awor nan a constata cu no ta laga e votador drenta den e reunion mientras cu ley ta permiti esey. E reunion a bisa, a hacie virtual locual no por pasobra e votador tin derecho pa haci reclamo.
Herde a presenta un lista di 3 mil firma di votadornan (di varios partuido) cu a pidi reconteo. E deseo tabata pa lanta un caso, a indica pero su abogado a bise cu ora e entrega e peticion ya probablemente e reunion a caba.
El a agrega cu den consulta cu su abogado e lo considera ki otro e por haci. El a reitera cu e reunion no tabata legal pasobra publico no por tabata presente y ta perde e derecho di pidi un reconteo.
Manera ta splica den un otro articulo, e reconteo no ta tuma lugar. Hoofd Stembureau a mira e cartanan cu a drenta, y ta mira kico ta e base y unda cu tabatin base concreto, a haci base concreto, a bay repasa. Otro cartanan cu no tabatin base concreto y ta djis algo general y no tin base riba hechonan, a descarta nan. Pesey a dicidi cu no a haya base pa bin cu un reconteo na ningun di e urnanan.
