ORANJESTAD (AAN): Desde cu Qredits a habri na Aruba como cuatro aña pasa, nan meta primordial ta pa duna tur sosten, conseho,
y guia na entrepreneurnan cu tin meta nan dilanti pa habri negoshi.
Durante 2021 a nota cu nan a hasta cuminza cu nan programa educacional na Enseñanza pa Empleo como tambe na Colegio EPI, pa asina suministra informacion valioso na publico, y tambe na studiantenan.
Aworaki a nota cu tin hopi hoben interesa pa cuminza cu negoshi. Den un entrevista cu Oliver Vieira di Qredits, el a splica cu esey ta algo cu nan tin na bista pa bay atende cu nan. Pesey mes a habri un oficina nobo, cu e idea pa ora un entrepreneur bishita nan, na final e lo sali di e oficina mas motiva pa cuminza cu e plannan. Pues na Qredits nan ta ricibi e hermentnan pa nan ta bon prepara pa tur esaki.
Corda cu Qredits no ta un organizacion super structura unda nan ta bay check e documentacion so, pero tambe e potencial. Y nan sa cu den hubentud tin hopi potencial.
Segun Vieira, e diferencia lo bay ta con ta logra acopla esey cu otro, pa yuda nan sea cu financiamento pa start nan negoshi, of si nan mester di djis guia pa yuda nan start di un forma of otro.
E balor agrega di Qredits ta hopi mas cu djis e placa, pero tambe e guia, educacion, y sosten cu bo ta haya. Awor cu nan oficina den Bilderdijkstraat poco pabao di Colegio Arubano, nan lo bay sigui yuda mas entrepreneur na Aruba logra cu nan soño ta bira realidad.
