Tres hoben di grupo 19 a caba nan Trayecto completo di SVT exitosamente

Coordinador Trahado Social Jessy Ras:

ORANJESTAD (AAN) Tres hoben a termina exitosamente nan Trayecto di Formacion Social, y nan ta di e grupo SVT-19. Asina e Coordinador di SVT, Jessy Ras, a duna di conoce den entrevista cu Matutino DIARIO.

   Ta trata di e hobennan Alexander Dorotaal, R.R. Maduro, y Leonardo Gomes Reyes.

   Nan a cuminza cu e trayecto aña pasa na Maart, pues despues di un aña e tres hobennan a finaliza henter e trayecto.

   “Dus e ta un dia bunita, emocionante, mirando cu e hobennan cu a termina awo a demostra perseverancia y cu nan a finaliza e trayecto cu exito”, Jessy Ras a expresa.

  Jessy Ras a reitera cu e grupo a cuminza na Maart 2025, cu 16 hoben. E ta haya lastima cu algun hoben a cay afo durante e parti semi-militar di e trayecto.

“Tin hobennan cu ta cay afo pa diferente motibo, y tin hobennan cu tabata motiva pa haci e trayecto, y nan a prefera pa bay traha na spera di e parti di seleccion di Arumil, mirando cu tin biaha cu e compensacion cu nan ta haya di nos, no ta suficiente. Nos a keda cu tres hoben hopi motiva cu awe ta terminando e trayecto”, Ras a subraya.

   Como Trahado Social, Jessy Ras a comenta cu semper ta keda un grupo di hoben cu tin cu yuda nan, tin di nan cu tin dificultad cu nan mes of problema social, of financiero, tin ora di comportacion. Tin hobennan cu ta sali for di e trayecto loke no ta un exito pa e Trayecto, pero si pa nan mes pasobra nan a keda motiva pa bay scol bek, of bay traha.

   “Como cu e programa ta un aña so, y ta lastima cu bo ta perde e bista e hobennan mirando cu sea nan ta cambia di number, y door cu nan no ta mara na nos mas. Durante un aña nan ta mara na nos pasobra nan tin cu cumpli, si no nan te perde e compensacion, of nan ta perde e trayecto”, Jessy Ras a comenta.

E ta sinti orguyo ora cu un compania ta yama SVT pasobra nan mester di un hoben, y nan sa di e trayecto.

   El a comparti un bunita experiencia di a topa un di e persona cu a haci e trayecto den un di e prome gruponan, y cu awo ta un adulto cu a forma un famia, ta supervisor den un hotel, y ta bon para.

   Jessy a duna di conoce cu SVT ta bezig cu inscripcion pa e grupo cu ta cuminza na Augustus proximo. E ta kere cu na final di Mei nan lo cera e inscripcion caba.