Parlamentario di AVP, Jennifer Arends-Reyes:
ORANJESTAD (AAN) - Den cuadro di celebracion di International Women's Day, un reunion importante a tuma lugar entre miembronan femenino di Parlamento, un grupo di studiante di Educampus den e comision parlamentario encarga cu Sustainable Development Goals (SDG) di United Nations. Durante e encuentro, Parlamentario Jennifer Arends-Reyes a comparti su vision riba participacion di hende muhe den politica, igualdad di oportunidad y e importancia di educacion pa fortalece posicion di mucha muhenan den nos sociedad.
Segun Arends-Reyes, su decision pa drenta den politica a nace for di un deseo profundo pa sirbi comunidad y contribui na un miho futuro pa Aruba. “Politica na final di cuenta ta trata di hende. Ta trata di decisionnan cu ta afecta famianan, educacion, oportunidadnan y calidad di bida riba nos isla,” el a expresa.
E parlamentario a reconoce cu pa hopi hende muhe, e paso pa drenta den politica por bin cu reto adicional, pasobra historicamente politica a wordo mira como un espacio mas domina pa homber. Sin embargo, e ta enfatisa cu hende muhe ta trece perspectivanan valioso, specialmente ora ta trata di temanan social, educacion, bienestar di famia y desaroyo di comunidad. “Representacion ta importante. Ora mucha muhernan mira hende muhe den posicion di liderazgo, e ta manda un mensahe poderoso cu nan voz tambe tin un lugar na e mesa di decision.”
Durante e reunion cu e studiantenan di Educampus, Arends-Reyes tambe a pone enfasis riba e rol crucial cu educacion ta hunga den forma lidernan di futuro. Segun Sra Arends-Reyes, scolnan por stimula interes den politica door di iniciativa manera club di debate, parlamento hubenil, conseho di e studiante y programanan cu ta siña hobennan con gobierno ta traha. “Ora hobennan compronde con decisionnan politico ta influi nan bida diario, nan ta cuminsa mira cu nan mes por forma parti di e proceso.”
Un otro tema importante discuti durante e encuentro tabata salud menstrual y e impacto cu e tin riba mucha muhenan den scol. Arends-Reyes a indica cu Parlamento por hunga un rol clave door di sostene politica pa educacion integral di salud, incluyendo informacion corecto riba ciclo menstrual. Segun Sra. Arends-Reyes, e tema aki ainda ta rodea pa stigma y falta comprension den hopi lugar.
“Educacion apropia por yuda tanto mucha muhe como mucha homber compronde cu e ciclo menstrual ta un proceso natural. E conocemento aki ta crea mas empatia, respeto y comprension den klas,” e la bisa. Tambe el a subraya e importancia di cu scolnan ofrece guia y apoyo adecua pa mucha muhenan durante e periodo di transicion aki.
Un punto central di e combersacion tabata aceso na productonan di higiene menstrual. Arends-Reyes a enfatisa cu e productonan aki no ta un luho sino un necesidad basico. “Ningun mucha muhe mester sinti berguensa, perde les of keda atras academicamente pasobra e falta di aceso na productonan basico di higiene.”
Entre e posibilidadnan menciona pa mehora aceso, el a señala revision di impuesto of derecho di importacion riba e productonan aki, y tambe iniciativa pa haci nan disponibel gratis of subsidia den scolnan y institucionnan comunitario.
Finalmente, Sra Arends-Reyes a papia riba importancia di elimina stereotipo dañino cu ainda ta limita oportunidad pa muhenan. Segun e parlamentario, igualdad ta rekeri un compromiso a largo plazo entre educacion, politica y cambio cultural. “Liderazgo no tin genero. Inteligencia emocional, empatia y colaboracion ta cualidadnan fuerte den liderazgo.”
E la conclui enfatisando cu ora mucha muhe y hende muhe en general tin oportunidad pa desaroya nan potencial completo, henter sociedad ta beneficia. “Igualdad no ta solamente un asunto di hende muhe — ta un inversion den un futuro mas fuerte pa Aruba.”
