Tres exposicion nobo ta ilumina Sala Safiro na Biblioteca Nacional Aruba

ORANJESTAD (AAN): Biblioteca Nacional Aruba a inicia un periodo nobo di exposicion den Sala Safiro, presentando diferente tema relevante pa comunidad.

Yosmar Sneek di Biblioteca Nacional Aruba a remarca cu e exposicionnan den Sala Safiro ta wordo cambia cada 4 luna. Ta trata di tres exposicion chikito, pero cu un contenido rico y educativo.

Sala Safiro ta un espacio unda comunidad por reuni, relaha, lesa buki, studia, lesa revista, uza computer y tambe haya mas informacion tocante e exposicionnan y biblioteca mes.

Den e periodo nobo aki, 1 di april te 31 di juli, a cuminsa cu tres exposicion interesante, dos bao encargo di dos trahado di BNA y un di nan ta den e seccion “Cashi di Comunidad”, unda lo por haya un exposicion dedica na trayectoria di e reconocido cantante Arubiano Sr. Lloyd Baptist, mihor conoci como “Mr. Happy Hour”. E exposicion aki ta mustra su carera, su contribucion na musica y su impacto den cultura local. Tambe ta un introduccion na e exposicion y ta bay tin 15 di mei na Biblioteca Nacional San Nicolas, Sr. Baptist a indica.

   E exposicion di Marlon van der Linden, trahado di BNA, ta enfoca riba e famoso escritora Chileno Isabel Allende, ganado di Premio Nobel di Literatura. Den e exposicion aki por haya informacion relevante tocante su bida, su obranan literario y su influencia den mundo di literatura enfoca den realismo magico.

   Banda di esaki, Giselle Lacle, tambe di BNA, ta presenta un exposicion special den conmemoracion di luna di conscientizacion di autismo. E exposicion ta brinda informacion importante pa aumenta comprension y consciencia den comunidad tocante autismo, Fundacion Autismo, enfatisaando riba kibra tabu, aumenta inclusividad y apoyo. El a laga sa cu e mes tin dos yiu autista y sa biba e dificultanan cu ta confronta aki na Aruba.

   Ademas di e tres exposicionnan menciona tin un cashi fiho di directora di BNA y tambe tin e cashi cu yama ‘Algo Mas’, cu e biaha aki ta trece e tema di campamento, Dia di Himno y Bandera y Rey Willem Alexander.

   Biblioteca Nacional Aruba ta invita tur hende pa pasa bishita Sala Safiro y admira e exposicionnan nobo cu cada un ta trece un mensahe importante pa comunidad.

   Sala Safiro ta habri pa publico dialuna y diaranson di 8:00 am te cu 7:00 pm, diamars, diahuebs y diabierna di 8:00 am te cu 5:00 pm.

   Esnan interesa pa participa of uza e espacio “Cashi di Comunidad” por tuma contacto cu Marlon, Giselle of Yosmar na Biblioteca Nacional Aruba.