Elsa a celebra su hubilo di 45 aña na CMB Bank

ORANJESTAD (AAN): Recientemente esnan di CMB Bank a tuma un momento recien pa honra Elsa Thielman-Rasmijn, kende a recorda e echo cu 45 aña pasa el a drenta den servicio di e banco.

    For di su comienzo na April 1981 como Utility Clerk, Elsa a crece den diferente funcion durante su trayecto, te cu a yega na posicion di Assistant Manager Bank Card Services, aportando cu su experiencia, liderazgo y compromiso.

   Gerencia ta masha agradecido pa tur loke Elsa a aporta na CMB durante e 45 aña aki. Su trayecto ta un ehempel bunita di lealtad, crecimento, y profesionalismo.

   Durante un ceremonia, a duna hopi pabien na Elsa pa su 45 aniversario di trabao.  El a ricibi bunita flor, e acostumbrado envelop, y un pin conmemorativo.  Nan ta desea Elsa hopi exito, salud y bendicion.