Tres candidata nobo instala pa certamen di Miss Youth Aruba 2025

Certamen final lo ta comienso di Augustus

ORANJESTAD (AAN): Diadomingo anochi, esnan responsabel pa Miss Youth Aruba Organization a tene un anochi di brindis, debi cu nan a instala nan candidatanan nobo pa e certamen aki cu lo tuma lugar na comienzo di Augustus.

   E anochi tabatin dos reina di beyeza di Miss Youth Aruba, esta Amelia Elskamp (Miss Youth Aruba 2023) y Jennely Winklaar (Miss Youth Aruba 2024) fungiendo como maestro di ceremonia.  E duo aki a yega y tuma mic y na un forma admirable, yen di focus, y bon articulacion di palabra a sa di suministra informacion na publico presente, y asina a introduci e candidatanan nobo pa e certamen aki.

   Organizador Robin Croes-Ponson tabata na banda ta admira e profesionalismo di tanto Amelia y Jennely riba escenario, y tabata guia e resto di evento.

   Asina a introduci e candidatanan nobo pa certamen di Miss Youth Aruba 2025.

   Candidata #1 ta Roshnie Sardjoe, kende pa e certamen ta representa distrito di Santa Cruz.   E candidata aki a splica cu el a wordo motiva door di varios persona kendenan a bis’e cu e ta hopi bunita, y e no a kere nan na prome bista, pero a dicidi toch pa inscribi, y awo e ta un di e candidatanan.  El a splica cu for di momento cu el a pone pia na Aruba, el a enamora di e isla y lo traha hopi duro pa asina representa e Aruba cu awor asina hopi e ta stima.  E ta desea pa hobennan cuminza kere mas den nan mes, como cu hopi di nan tin talentonan fabuloso cu tremendo idea, pero nan ta duda den nan mes.

   Candidata #2 ta Eimy Contreras Bedoya, kende ta representa distrito di Noord.  E candidata aki ta sinti cu e ta un hoben ehemplar, y danki na plataforma di Miss Youth e por ta un vocero pa hobennan di awendia, y cu esey ta dune e forza y curashi pa participa den certamen di beyeza.  Su meta ta pa participa den un certamen di beyeza internacional, y pa mustra cu Aruba ta hende cu hopi calor humano, yen di amor y cultura, y esaki ta loke ta mas bunita.  Su deseo ta pa pone hobennan stima nan mes mas, y no laga critica negativo stroba nan, y djis usa esey pa pusha nan bay mas dilanti pa asina tin e poder di benta e barera abao cu por stroba nan di logra nan soño.

   Candidata #3 ta Paula Andrea Acosta, kende ta representa distrito di Oranjestad.  E candidata aki a splica cu e ta participando, como cu e ta kere cu esey lo yud’e desaroya su mes como ‘persona’, y tambe como muhe pa asina fortalece su seguridad.  E lo ta orguyoso si acaso e por representa Aruba den exterior, como cu e isla aki ta demasiado bunita, y ta duna hendenan hopi balor.  Loke e lo kier cambia di hubentud ta pa concientiza nan di nan salud mental, pasobra e no ta kere cu social media ta haciendo algo bon den esaki.

   Candidata Roshnie Sjardoe a wordo instala door di Jehdeiah Flanegin (candidata nobo di Miss Teen Aruba International 2025).  Candidata Eimy Contreras Bedoya a wordo instala door di Jaidyleen Tromp (Miss Teen Aruba 2024).   Candidata Paula Andrea Acosta a wordo instala door di Briannah Arrindell (Miss Tourism World 2025).

   E certamen final mes lo ta Diasabra 2 di Augustus 2025, y e lugar ainda no a wordo divulga. DIARIO ta desea e candidatanan hopi exito den e luna aki di preparacion, y tambe hopi forza na e comision organizado.