Adrie Williams di CGTC Curacao a duna un presentacion interesante pa Sindicato TOPA

ORANJESTAD (AAN)—Adrie Williams, representante di “Central General di Trahadornan di Corsou” CGTC,

actualmente ta na Aruba, unda el a bin duna un presentacion na e delegadonan di Sindicato TOPA y su directiva. El a bin hunto cu su yiu e hoben Diadrie Williams cu tambe a duna un presentacion.

Adrie Williams a duna di conoce cu su presentacion tin di haber cu e hecho cu TOPA tin hende nobo den su directiva, y tambe den e circulo di esnan cu ta representa e sindicato den diferente puesto laboral, pa orienta nan den e direccion.

“Awendia ta conoci cu e situacion a cambia hopi, den e manera di haya trabao, plataformanan digital mester a hunga un rol masha, masha grandi mes, con ta atende cu trabao, con ta busca trabao, con gobiernonan y tambe otro instancianan ta busca hende riba e tipo di plataformanan ey, con leynan laboral ta bira suheto na e situacion nobo ey, anto con medionan social e buscamento di trabao si, of no”, Adrie Williams a señala.

Den e contexto aki, Williams a duna presentacion riba e topiconan ey, kico ta importante pa loke ta trata asuntonan di statutonan di e organizacion cu lo mester wordo adapta na e realidadnan moderno tin actualmente y pa esey, con pa atrae e hubentud pa bira miembro di sindicato.

El a splica cu pesey el a bin cu su yiu cu ta un influencer riba un red social hopi uza, y bon conoci pa e temanan eynan, p’asina ey e pasa e conocemento cu e tin y di e manera ey nos envolve nos hubentud Arubiano tambe, den trabaonan sindical.

Encuanto e retonan grandi cu tin el a elabora riba plataformanan sindical.

“Si bo ta bay traha cu plataformanan sindical, e ta nifica cu bo no sa ken ta bo doño di trabao; e ora ey bo no por pleita pa bo casonan, pero loke si a pasa ta, cu recientemente, den e ultimo reunion di ILO esey tabata e topico: con ta bay regula plataformanan digital di trabao, pa di e manera ey y tambe e derecho di sindicalizacion no por bay perdi den e concepto”, Williams a señala.