Tres candidata di Miss Teen Aruba pasando den duro a wordo honra pa nan corahe

ORANJESTAD (AAN): Awendia hopi hende no sa cuanto problema cada famia, cada tata y mama, y tambe con grandi e cruz ta cu nan mesun yiunan ta carga tur dia, tur siman, y henter aña cune.

   Esey ta e mensahe cu Diadomingo anochi a ser treci dilanti, durante e certamen di Miss Teen Aruba International 2021 teni den Cas di Cultura.

   E presentador George Winterdaal a splica cu awendia den e epoca aki, ta importante pa tin union tur caminda!  Union cerca e profesionalnan, union den instancianan, pero tambe union den comunidad, cerca mayornan, educadornan, y tur esaki pa pone atencion special riba e casonan aki.

   Aki el a enfatiza cu esey no ta pa djis semper señala e muchanan, pero pa por yuda nan.  Pasobra abo como ciudadano, bo no sa kizas ki trauma nan tin.  Nan ta hoben y mester di bo pa guia nan.

   Di e forma aki e presentador a mustra riba e dificultad y guia cu a ser duna na algun candidata di nan cu e momento ey tabata riba escenario.

   El a mustra riba Candidata #2, esta Cindy Ann representando Fundacion Mi Voz Ta Bo Voz, a pasa tambe den abuso.  Y e kier a usa e plataforma aki pa trece e mensahe y tambe su storia.

   Pero no ta solamente Cindy, y aki Winterdaal a enfatiza riba un otro candidata cu tampoco no tabatin un periodo facil.

   El a referi na Candidata #4, Shaswina kende a enfrenta hopi bullying pasobra kizas su capacidad pa studia ta poco dificil, pero asina mes e ta logra.

   Tambe a papia di Candidata #3 cu ta Kaylienne, kende riba escenario ta cu un sonrisa, pero tampoco no tine facil.  Su tata ta grave cu cancer, pero pa e certamen e ta haci lo posible pa keda cu sonrisa.

   DIARIO a nota cu na momento cu George Winterdaal tabata bisando esaki, cu e candidatanan a bira hopi emocional riba escenario, y tabata ricibi sosten di demas candidatanan den forma di abrazo di grupo.

   Cu e mensahe aki, e organizacion GLW Foundation a entrega tres medaya na Cindy, Shaswina, y na Kaylienne cu e titulo di “Miss Teen Corahe 2021”.

   Claro tin e chens cu tur ocho candidata ta pasando den duro, pero toch e anochi aki e organizacion kier a mustra nan aprecio pa e tres candidatanan ey.  E reina saliente Ileyna de Cuba a entrega e medayanan, mientras cu henter publico presente a aplaudi, y despues lanta para pa sigui duna aplauso, mustrando nan apoyo.  Miembronan di Hurado tambe a lanta para.