Tremendo Show “A not so silent night” den Cas di Cultura”

New Timbiriche y Lolopop Generation a derocha talento den voz y baile pa gradici Dios pa tur cos

ORANJESTAD (AAN) – NTG & NLG, New Timbirichi y Lolopop Generation a presenta un tremendo show di baile den Cas di Cultura yama: “A not so silent night”, usando voz y talento den baile pa gradici Dios pa tur cos, tanto e cosnan bon como esnan no mucho bon cu ta siña hende bira mas fuerte y aprecia mas e momentonan bon den bida.

Kiermen, no tabata un anochi keto, pero un anochi unda a demostra gratitud baliando. Tambe a dedica e anochi aki na un mucha yama Marisol, cu a recupera di un kibranto di salud cu tabata momentonan dificil pa su mayornan, cu tabata cune henter dia. A gradici Dios pa e recuperacion di Marisol y pa su mayornan incansable.

Riba escenario den Cas di Cultura por a mira hopi briyo, color, movecion, alegria, y profesionalismo, durante e dianan 14 y 15 di December awo, cu e show a tuma lugar.