ORANJESTAD (AAN): Director di ATIA, esta Herrick Henriquez ta hopi satisfecho cu recien e Fundacion RCC ta buscando forma pa acredita e companianan miembro, pa asina pone tur e negoshinan di construccion cana riba un solo linea.
Den un entrevista cu DIARIO, el a mustra cu na comienzo, Aruba Trade & Industry Association (ATIA) a keda hopi interesa par di aña pasa ora cu RCC a acerca e asociacion cu e iniciativa aki di registracion di companianan di construccion. E director anterior di ATIA a duna su cooperacion completo pa esaki bira realidad.
Segun Henriquez, awor ta un honor pa por lanza e proyecto aki hunto cu Fundacion RCC (Registracion Companianan di Construccion), como cu e lo bay yuda comunidad di Aruba masha hopi mes y den diferente aspecto.
Den e aspecto cu awor ta bay tin un registracion y certificacion di companianan independiente, pa asina ta sigur cu e negoshinan aki ta cumpli cu reglanan. Pues e.o. cu bo ta sigur cu nan ta paga nan impuesto, nan ta paga nan empleadonan, y ta adkiri na tur regla pa por maneha un bon negoshi.
E ora clientenan na Aruba, incluyendo comerciantenan, ora cu nan bay haci uso di un di e companianan di construccion aki, e ora bo ta garantiza cu bo lo haya calidad, cu e empleadonan ta haya bon pago, y cu e compania tambe ta yuda contribui nan fair-share cu caha di pueblo.
Pa 2022, ATIA ta bay purba pa Fundacion RCC haya mas acogida den comunidad, lo bay papia cu Gobierno pa asina haya nan tambe den e asunto na nan fabor, esta cu renobacionnan di edificionan di Gobierno pa nan usa companianan local, y no manera den pasado a usa companianan di exterior.
Pasobra tin di corda cu negoshinan local tin tur experticio, conocemento, y profesionalismo y awor tin certificacion.
Tambe ATIA hunto cu RCC kier papia cu sector priva, e.o. Banconan, Companianan di Aseguro, pa nan tambe cuminza promove e iniciativa aki pa asina ora tin di haci construccion, nan cuminza usa e companianan aki pa asina nan tambe tin garantia cu e calidad di edificio of cas lo ta bon calidad.
