Reunion cu meta cla pa futuro economico di Aruba, Corsow y Sint Maarten:
ORANJESTAD (AAN): Diaranson 29 di Januari Minister Grisha Heyliger – Marten a habri e evento Taking the Reins: Aruba, Curaçao, and Sint Maarten - Driving Their Economic Future in Sint Maarten. Un evento di tres dia dirigi riba expertonan economico di Aruba, Corsow y Sint Maarten cu lo trata e futuro economico sostenibel di e tres paisnan.
“Nos proposito ta cla: pa trece hunto expertonan y profesionalnan cu ta traha riba
un futuro sostenibel di estadonan insular. Y pa comparti conocemento, lanta ideanan, y construi conexionnan den henter Caribe y Reino Hulandes. Pa guia nos combersacionnan, nos a scohe e cuadro di Estadonan Chikito den Desaroyo (SIDS).
E ta hopi relevante pa Aruba, Corsow y Sint Maarten, y e ta duna nos un fundeshi internacionalmente reconoci pa construi riba dje. E por ofrece un vision y acercamento comparti pa construi economianan resiliente.
Durante e proximo dianan, nos ta aki pa fortalece asociacionnan, lanta ideanan innovativo, y identifica areanan pa aumenta colaboracion. Nos meta ta pa conclui cu un declaracion colectivo y algun siguiente paso cla den futuro”, asina Lennard Nijenhuis, Coordinating Country Advisor Curaçao pa TWO ta bisa.
Minister Heyliger – Marten a identifica un condicion importante pa construi un economia fuerte den futuro. “Nos mester sa nos destinacion y dirigi nos ruta pa yega eynan. Decisionnan mester ta basa riba hechonan y no suposicionnan. Usando un acercamento basa riba dato pa tomo di decision y extende mas leu cu politica pa tuma accionnan clave cu lo sostene e futuro di e hendenan di nos paisnan.”
E evento a wordo haci posibel door di e Organisacion Temporal y a wordo crea den estrecho colaboracion cu Departamento di Asuntonan Economico, Comercio y Industria (DEZHI) di Aruba, Ministerio di Desaroyo Economico di Curaçao y Ministerio di Turismo, Asuntonan Economico, Transporte y Telecomunicacion di pais anfitrion Sint Maarten.
