E hoben di 20 aña di edad lo perde gran parti di su hubentud
WILLEMSTAD: Diaranson e atencion completo di Curaçao tabata dirigi riba Corte di Husticia, ora cu Hues a presenta sentencia riba tres hoben di e isla, kendenan a tira y mata un Polis di Grensbewaking di Marechaussee Real aña pasa durante un atraco arma. E impacto di bala a cobra bida di e Marechaussee conoci como Toon Brood.
Den un solo palabra, Hues a describi e forma cu e hobennan a actua como “sin compasion ni resentimento”.
E Polis Hulandes y su casa Sonja riba e anochi di 31 di Mei 2024 tabata sinta den veranda di nan cas. Hunto nan tabata mirando un pelicula riba TV. E Polis a lanta para ora cu el a tende un sonido den sala. Ora cu el a bay paden, el a mira tres intruso. Despues di un luchamento caminda Polis Brood a trata di gara arma di un di e intrusonan, a tende un tiro. Polis Brood a cay ta grita di dolor na suela. E intrusonan a gara Sonja y zwaai e duro abao na suela, y sin por haci nada a keda mira con su casa tabata muri poco-poco di e heridanan. Ora cu e atracadornan brutal porfin a bandona e cas lagando esaki tur reboltea, Sonja a core bay pafo pidi pa auxilio. Esaki a yega laat, pasobra e no tabatin señal vital mas.
E viuda di e Polis a testigua den Corte, cu e atracadornan aki a actua extremadamente brutal den e cas, aunke tabatin presencia di muchanan chikito.
E acusado principal, esta Amon Fraay di 20 aña di edad a baha su cabez ora el a tende Hues impone un castigo di 26 aña di prison pe. El a haya 2 aña menos, compara cu e 28 aña di prison cu Fiscal a exigi pe. E ta esun cu a haya mas castigo, pasobra ni 9 luna prome cu morto di e Polis Hulandes, el a tira y mata un otro homber di 25 aña djis debi na discusion pa algun aparato di Vaping.
Hues a expresa, cu e otro acusado, Aivano Martina di 23 aña, a tira e Polis Brood mata den su mesun cas. El a ricibi castigo di 18 aña di prison, mientras cu Fiscal a exigi 20 aña.
E otro acusado, esta Claverzjion Nocento di 26 aña, a tende Hues impone un castigo di 16 aña di prison. Fiscal a exigi 18 aña cera p’e.
Contra e chauffeur Glennson Zimmerman di 27 aña, Fiscal a exigi castigo di cinco aña. Pero Hues a dune solamente 30 luna di prison, di cual 6 luna ta condicional cu tempo di prueba di un aña. Durante e asesinato, e tabata den un auto y segun Hues e no ta complice di asesinato.
Varios persona na Curaçao a expresa cu nan ta haya e castigonan aki di 26 aña, 18 aña, y 16 aña demasiado liviano pa un caso asina brutal cu resultado final.
E hobennan aki lo keda encarcela y sigur perde gran parti di nan hubentud awor cera tras di trali.
Riba e potret por mira imagen di e victima, Polis Toon Brood di Koninklijke Marechaussee.
