Trecemento di carga via avion a subi mas den prome cuartal na Aruba

Relato di prome cuartal di 2022

ORANJESTAD (AAN): E siman aki, Oficina Central di Estadistica a presenta e resultadonan principal di e cifranan di importacion y exportacion, cu ta regarda e prome cuartal 2022.

   Importacion total: Pa check e sector di Importacion total, den peso, a registra un subida di 60.6% den e prome cuartal di 2022 (158.9 miyon kg) compara cu e mesun periodo den 2021 (99.0 miyon kg), den balor, el a subi cu 42.2% di Afl. 397.7 miyon pa Afl. 565.5 miyon.

   Importacion pa Area Liber (peso): Pa e sector di Importacion pa e area liber di Aruba pa e prome cuartal di 2022, a subi cu 60.9% di 97.4 miyon kg na 2021 pa 156.7 miyon kg na 2022.

    Durante e periodo aki 18 di e bintiun seccionnan, a registra subida den importacion den peso pa e area liber di Aruba.

   E subidanan mas grandi a worde registra ta den e seccion “Productonan mineral” (52.3 miyon kg), “Productonan alimenticio” (2.1 miyon kg) y “Obranan di piedra, gips, cement of asbest)” (1.3 miyon kg).

   E caidanan mas grandi ta den e seccionnan “Productonan vegetal” (-0.4 miyon kg) y “Azeta y otro productonan traha di vet” (-0.1 miyon kg).

   Importacion pa Area Liber (balor): Pa e sector di Importacion pa e area liber di Aruba pa e prome cuartal di 2022, den balor, a subi cu 40.5% di Afl. 381.3 miyon na 2021 pa Afl. 535.8 miyon na 2022. Durante e periodo aki tur 21 seccionnan, a registra subida den importacion den balor pa e area liber di Aruba.

   E subidanan mas grandi ta den e seccionnan “Makinaria y ekiponan electronico (nobo y renoba)” (Afl. 21.8 miyon), “Productonan mineral” (Afl. 18.4 miyon) y “Productonan alimenticio” (Afl. 14.6 mln).

    Importacion pa e area di Free Zone di Aruba: Pa e sector di Importacion pa e area di Free Zone di Aruba, den peso, a registra un subida di 43.8% den e prome cuartal di 2022 (2.3 miyon kg) compara cu e mesun periodo den 2021 (1.6 miyon kg), den balor, el a subi cu 81.5% di Afl. 16.4 miyon pa Afl. 29.7 miyon

E importacion (pa e area liber di Aruba) menciona anteriormente ta e resultado di Importacion via Lama y Importacion via Aire, cual tabata tin e siguiente desarayonan:

1. Importacion pa e area liber di Aruba via Lama: Importacion via di Lama pa e area liber di Aruba, den peso, a registra un subida di 61.2% den e prome cuartal di 2022 (156.0 miyon kg) compara cu e mesun periodo den 2021 (96.8 miyon kg), den balor, el a subi cu 39.6% di Afl. 312.6 miyon pa Afl. 436.5 miyon
2. Importacion pa e area liber di Aruba via Aire: Importacion via di aire pa e area liber di Aruba, den peso, a registra un subida di 13.1% den e prome cuartal di 2022 (0.7 miyon kg).

   Esey ta compara cu e mesun periodo den 2021 (0.6 miyon kg), den balor, tin un subida di 44.5% di Afl. 68.7 miyon pa Afl. 99.2 miyon.

   Pues e trecemento di carga via Air Cargo a subi mas durante e prome cuartal aki.

   Importacion pa e area liber di Aruba pa “Companianan grandi”:  Den e sector di Importacion pa “Companianan grandi”, den peso, a subi cu 12.1%, di 20.1 miyon kg den e prome cuartal di 2021 pa 22.5 miyon kg den e prome cuartal di 2022, mientras, den balor, tin un subida di 48.5%, di Afl. 39.7 miyon pa Afl. 59.0 mln .