ORANJESTAD (AAN): Aña pasa e famia di Imelda Kleuterschool a drenta bek den edificio situa na De La Sallestraat, despues di tabata temporalmente na un otro localidad pa motibo di renobacion.
Nan tin un aña y mei den e edificio y ta hopi contento di ta bek na cas cu un team yen di energia pa traha na bienestar di nan alumnonan.
Pero Imelda Kleuterschool ainda tin algun proyecto cu nan ta desea pa cumpli cune pa asina nan por mantene su mes na e desaroyonan actual, cumpli cu necesidad di nan alumnonan y sigui brinda calidad di enseñansa den forma inovativo.
Actualmente nan meta principal ta pa cumpli cu SDG number 7 esta “Affordabel and Clean Energy”, poniendo Solar Panels na scol. Asina tambe nan por economisa riba gastonan di energia y inverti e placa aki bek den inovacion y desaroyo di nan alumnonan.
Nan ta conciente cu nan mester traha duro pa logra esaki.
-Un tiki di historia di Imelda Kleuterschool.
Imelda Kleuterschool a ser funda na aña 1961. Pa mas di 60 aña Imelda Kleuterschool ta cas di enseñansa pa un gran parti di e comunidad Arubano.
Actualmente nan tin 201 alumno, 12 maestro y 7 stagiaire. Manera nan lema ta bisa “It takes a team to help Children Dream” y nan ta cla pa traha como un team fuerte pa alcanza nan meta.
E prome actividad ta un Bingo virtual cu lo tuma lugar diasabra 14 di mei, pa 7’or pm via e siguiente plataformanan: Facebook: Bingo Aruba; YouTube: Bingo Aruba; Tv: Canal 49; Radio: Bo Guia 89.9 FM.
Sinembargo nan no por logra esaki nan so y mester di sosten di comunidad y nan ta acerca pueblo di Aruba pa sostene nan cumprando ticket di Bingo. E carchinan ta obtenibel na Valero Oranjestad; Queen Euro Lottery na Bubali; Shiribana 8 na Paradera y cerca e maestro y alumnonan di Imelda Kleuterschool.
