Trayecto di Formacion Social di Aruba a bay finalisa nan fase Militar na Curaçao

ORANJESTAD (AAN): Trayecto di Formacion Social (Sociaal Vormings Traject-SVT) di Aruba y Curaçao, hunto a finalisa nan fase militar na Curacao. 

E dianan ku ta tras di lomba tabata den e enfoke di aktividadnan intensivo, cu cursistanan y nan supervisornan a pasa cu exito.

   Comienso di siman mes a tuma lugar e crusada amfíbico, sigui pa subimento di e tres seronan (Veerisberg, Jack Evertzberg y Seru Pretu) e siguiente dia.  Ademas e cursistanan a completa e prueba di landamento di cuater dia, den piscina na Parera. E actividadnan varia aki no solamente ta forma un experiencia di aprendisahe pa e cursistanan, pero ta brinda tambe momentonan di siñansa balioso pa e miembronan ehecutivo y e instructornan cu ta involucra den e trayecto aki.

   Ta di prome biaha desde establecimento di e Trayecto na 2011, cu ambos Trayecto di Formacion Social di e dos paisnan ta reuni hunto. Durante e Trayecto carakteristicanan manera disciplina, perseverancia, respet personal, structura y responsabilidad ta para central. Defensa ta encarga cu e fase militar hunto cu Fundacion Proyecto ‘Un Komienso Nobo’.

   Awe Diahuebs, e cursistanan lo bay wordo ricibi cu aplauso na e entrada na Fort Amsterdam, cu cual nan a finalisa e fase militar y ta sigui pa e trayecto di enseñansa y labor.