Trayecto di disciplina y oportunidad y e momento bunita di graduacion di Formacion Social

ORANJESTAD (AAN): Un grupo di hoben a celebra un momento importante den nan bida cu e ceremonia di graduacion di Formacion Social (SVT) #19,

caminda nan a ricibi nan certificado despues di completa e segundo fase di e programa. E ceremonia a tuma luga den presencia di Prome Minister Mike Eman, Minister Mervin Wyatt-Ras, representante di Marina Real, instructornan y famianan orguyoso.

Durante su discurso, Prome Minister Mike Eman a enfatisa e importancia di e programa SVT como un oportunidad pa hobennan cu ta buscando orientacion den un momento crucial di nan bida.

   Segun Premier Eman, hopi di e participante nan ta yega na un punto den nan bida caminda nan ta reflexiona riba nan futuro: si nan kier sigui studia, cuminsa traha, of busca un caminda cu ta duna mas significado na nan bida.

   “E programa aki ta duna e hobennan oportunidad pa traha riba nan personalidad, disciplina y nan vision pa futuro,” Eman a expresa.

   El a resalta cu e iniciativa di SVT, crea pa yuda e hobennan desaroya nan potencial y pa duna nan e guia necesario pa logra nan meta personal y profesional. Prome Minister tambe a reconoce e contribucion di Jessica Ras y Nicole Whitfield-Godett, cu desde e inicio a hunga un papel importante den desaroyo di e programa, manera tambe e sosten continuo di Marina Real y ARUMIL.

   Segun Jessica Ras, coordinadora di Formacion Social, e grupo di SVT #19 a cuminsa nan trayecto na maart di aña pasa y despues di un aña di entrenamento y formacion nan a logra completa e programa cu exito.

   “Awe tres hoben a finalisa e trayecto. Nos ta sumamente contento cu nan a logra termina cu exito,” Ras a splica.

   Nan experiencia: Pa Alexander Dorotaal, e trayecto SVT a representa un paso importante den su desarrollo personal. Segun el, e programa a yuda el comprende e importancia di disciplina y perseverancia pa logra su meta.   “Mi kier logra algo den mi bida y duna mi mes un oportunidad pa sigui dilanti,” Dorotal a expresa.

   Pa Leonardo Gomez, e experiencia tabata positivo y educativo, apesar cu e prome lunanan tabata exigente. “E prome lunanan tabata un tiki duro, pero despues bo ta custumbra. Bo ta siña hopi y bo ta forma bon amistad cu otro hoben,” Gomez a relata. El a indica cu e programa a dun’e e confianza y orguyo pa sigui avansa den su bida. “Mi ta recomenda otro hoben pa participa. Bo ta haya un diploma y e ta algo cu por yuda bo den futuro,” Gomez a comenta.

   E ceremonia di graduacion di SVT #19 a marca e final di un etapa importante pa e participantenan, pero tambe e cuminsamento di un capitulo nobo den nan desaroyo personal y profesional.