Cu reconocimento na señor Alejandro ‘Lee’ de Windt:
- Fundacion Rancho kier wak e apoyo di un publico grandi
ORANJESTAD (AAN) Director di Fundacion Rancho, señor Clifford Rosa, a indica den entrevista cu Matutino DIARIO, cu den e evento di carera di boto miniatura den e contexto di celebracion di Aruba su Dia Nacional di Himno y Bandera, e fundacion a duna reconocimento na un baluarte, y tambe nan kier a pone nomber na e carera, asina nan lo dun’e nomber di señor Alejandro “Lee” de Windt.
“Eigenlijk, e aña aki nos ta bay cuminza y nos ta bay duna e persona aki den bida, un reconocemento como baluarte pa practica y conserva e herencia cultural intangible cu ta ‘hunga boto’.
E botonan miniatura ta loke nos ta conservando, como un parti di nos herencia cultural intangible, y nos mester di nos hendenan grandi pa traspasa nan conocemento”, señor Rosa a señala.
El a splica cu señor de Windt tin añanan practicando e deporte aki (e herencia cultural aki), y p’esey nan ta pone atencion na dje.
“Y na mesun momento, nos ta haci un yamada na e hobennan, pa asina aki nan por bin practica y participa den un evento asina, y tambe pa nan ta den contacto cu locual ta un parti di nos herencia cultural intangible”, Clifford Rosa a duna di conoce.
Pues e aña aki, bao di e tema di 40 aña di Status Aparte, y 50 aña di nos Himno y Bandera, unda cu un biaha mas lo ta den e area di Governor’s Beach, unda lo tin un evento, un biaha mas, pa e participantenan, pero Clifford Rosa kier pa bin hopi mas publico pa apoya y sostene e evento aki.
“Mi ta haci un yamado di parti di e Directiva di Fundacion Rancho, cu ta trahando incansablemente pa proteha y conserva parti di nos herencia cultural intangible”, señor Rosa a reitera.
Tambe e ta haci un yamado na tur capitan y doño di boto p’asina nan por saca nan boto y registra.
“Nos registracion ta cuminza pa 7’or y mey di mainta, y p’asina ey nos por tin suficiente persona presente y por cuminza cu e careranan di categoria 30 lo mas pronto posibel, esta 10.30’or.
Na inicio di e carera nos ta bay duna homenahe cu a bay na señor Alejandro ‘Lee’ de Windt”, director di Fundacion Rancho a ratifica.
