Trata algun punto esencial pa mehoramento di Biblioteca Nacional na San Nicolas  

ORANJESTAD (AAN): Recientemente, Minister di Enseñansa Endy Croes a reuni cu directora di Biblioteca Nacional Aruba (BNA) Señora Astrid Britten,

director di Dienst Openbare Werken Aruba (DOW) Sr. Marlon Croes y staf y Sindicato di Empleadonan Publico y Priva Aruba (Seppa) pa dialoga specificamente riba Biblioteca Nacional na San Nicolas.

   Pa algun tempo caba, tin basta peticion riba algun punto cu no ta den condicion optimal na Biblioteca Nacional na San Nicolas. Pa e motibo aki, a reuni pa tur partido ta na altura kico ta e necesidadnan cu tin y pa tur hende ta riba mesun linea.

   A palabra cu DOW pa haci un evaluacion completo, primordialmente riba e puntonan aki, pero tambe riba otro aspectonan. E evaluacion aki lo tuma luga durante e prome kwartaal di e aña 2024, pues di awo pa maart lo tin e documento aki cu e costo pa inicia cu e restauracion.

   Unabes cu tin e documento riba mesa, lo bini back hunto pa despues atende esaki cu demas coleganan minister y finalmente cu Departamento di Finanzas pa aloca fondo pa traha riba e aspectonan aki. En berdad DOW ta hopi ocupa, haciendo diferente trabao, entre otro, evaluacion na tur scol di Aruba den cuadro cu Landspakket pa Minister di Enseñansa Endy Croes, pero a haci un compromiso cu nan lo inicia cu e evaluacion pronto na BNA San Nicolas.

   Unabes cu DOW ta cla cu e evaluacion y tin fondo disponibel lo por cuminsa planifica ki tempo precies lo inicia cu e restauracion di e puntonan cu ta rekeri di mas atencion na BNA San Nicolas.

   Pa finalisa, Minister Endy Croes a indica cu e tabata un bon reunion, unda a haci diferente palabracion concreto pa mehora algun aspecto importante na Biblioteca Nacional na San Nicolas