Parlamentario Marco Berlis
- Gobierno impulsando nos pais riba un caminda di recuperacion structural
ORANJESTAD (AAN): Den un Openbare Bijeenkomst riba Diahuebs Januari 11 2024, minister Geoffrey Wever di Asuntonan Economico a duna un presentacion di e economic outlook di nos pais cubriendo 2023-2025. Minister Wever a haci un presentacion den Parlamento di cifranan comparando y dunando resultado di proyeccionan realistico di nos economia.
Mester bisa cu enberdad nos pais no ta djis recuperando sino tambe ta recuperando mas fuertemente cu a proyecta originalmente. Esaki ta algo remarcable, pasobra awor pueblo por constata cu e proyeccionnan di gobierno no a keda djis na pronosticonan sino tambe a cristalisa berdaderamente. Henter Parlamento por a constata esaki, y pe motibo aki no tabata tin mucho pregunta y poltikeria haci cu e presentacion. Siguientemente mi ta bay duna un resumen di e presentacion di e “economic outlook” den Parlamento.
Crecemento economico 2023-2025: Na final di 2023 e bisa cu e economia di Aruba a crece cu 10.1%. Esaki ta un crecemento hopi grandi. Sinembargo ricibiendo e cifranan final a constata cu e economia a crece realmente cu 13.7%. Esaki ta 3.6% mas cu a constata originalmente. Esaki ta indicacion fuerte cu nos economia ta creciendo stabil, y di un forma structural ta expandiendo door di un maneho responsabel di gabinete Wever-Croes-II.
Economia di Aruba a crece 112% compara cu 2019, cu tabata e aña record den turismo pa nos pais den pasado.
Minister Wever a splica cu a recupera loke a perde na 2020 y awor un crecemento mas modera di nos economia ta proyecta. E crecemento economico pa 2024 ta 3.0%
Inflacion pronostica y real 2023-2025: Gobierno a pronostica un inflacion di 4.4% originalmente sinembargo esaki a baha te na 3.6% segun e ultimo datonan. Esaki sigur ta un gran logro atrobe. Inflacion pa 2023: 3.6%, pa 2024: proyecta pa yega 3.5% y pa 2025 e ta yega 2.7%. Adicionalmente IMF ta pronostica cu inflacion entre 2023-2025 lo ta; 2023 – 4.5%, 2024 – 2.3%, 2025 – 2.1%
Otro proyeccionnan:
(1) Proyeccionnan di inversion priva: pa 2023: 1.5 Biyon Florin. Esaki ta un crecemento di 39.6% y 112% di nivel di 2019. Na 2024 tambe e lo ta 1.5 Biyon Florin. Esaki lo ta un 0.2% y 112.3% di nivel di 2019. Manera pueblo por wak, tin crecemento tur caminda.
(2) Entrada di Turismo: 2023 entrada di Turismo a yega 4.7 Biyon Florin. Esaki ta 15.9% y 136.2% di nivel di 2019, cu tabata un aña di record den Turismo. Na 2024 entrada di Turismo tabata 5.1 Biyon Florin, esaki ta 6.6% y 145.1% di nivel di 2019.
(3) Crecemento di GDP: na 2022 GDP di nos pais tabata na 5.2 biyon Florin. na 2023 e tabata 5.5 biyon Florin. Na 2023 nos a conoce un crecemento di 4.8% di nos GDP compara cu 2022.
Otro logronan: Pueblo no mester lubida cu recientemente tambe cifranan historico di desempleo a keda publica y anuncia pa minister di Labor sr. Glenbert Croes. Desempleo a baha te na 4.3%. Esaki tambe ta un indicador fuerte cu tin mas hende trahando cu ta hayando entrada pa nan hogar. Tambe otro bon noticia tabata e hecho cu 5.1% mas hende a haya empleo den sector priva. Un bon economia ta sigura cu comerciantenan por expande nan negoshi, emplea mas hende, y di e forma aki e recuperacion economico di nos pais tambe ta alcansa e hogar y famianan di nos comunidad.
