Traspaso di edificio historico ‘John G. Eman’ ta importante pa preservacion di patrimonio

Prome Ministro Eman:

ORANJESTAD (AAN): Manera cu DIARIO a trece dilanti caba, riba Dialuna a tuma luga e traspaso oficial di e edificio historico “John G. Eman”, un structura emblematico localisa na Caya G.F. Betico Croes 41 cu ta inicio di e historia di Aruba Bank (antes John G. Eman Bank). E evento ta marca un momento crucial den e esfuersonan pa conserva y restaura e patrimonio arkitectonico di Oranjestad pa e generacionnan futuro.

   E edificio, construi na e aña 1925 pa fundado John G. Eman, un visionario di su tempo, cu a cana hunto cu Aruba su desaroyo, caminda posteriormente converti na Aruba Bank, a sirbi durante hopi aña como un oficina bancario prominente na nos isla.

   Durante momentonan dificil, for di un caya di santo y lanterna como iluminacion, a duna inicio di un desaroyo di un pais den buskeda di ofrece su comunidad un miho oportunidad. “Cada cambio y momento di e caya ta un refleho di e desaroyo di nos pais”, ta locual cu Prome Minister mr. Mike Eman a comparti durante su discurso na ceremonia di traspaso.

   Den un ceremonia oficial, Stichting Monumentenfonds Aruba (SMFA), Aruba Bank N.V., Ministerio di Economia Finansa y Sector Primario mr. Geoffrey Wever y Prome Minister di Aruba a formalisa e ceremonia di traspaso di propiedad pa e fundacion. E actividad ta un logro monumental pa e proteccion di nos historia y cultura.

   E traspaso oficial ta representa un colaboracion fructifero entre gobierno, sector priva y organizacion pa proteha e isla su legado historico, crea un balor grandi pa e comunidad, y duna bida renoba na un di nos edificionan mas representativo.

   Premier Eman a indica cu cada bes cu mira reto den desaroyo di Aruba, ta mira cu e mes un Caya Grandi ( un ader di nos pais ) tambe ta conoce un sla. Den su parecer, simbolicamente of efectivamente, no por tin un restauracion completo di Aruba sin restauracion di e ader aki di nos pais. Un vinculo di generacion, entrada di pais Aruba, y vecindarionan conecta cu a yuda carga e pais aki.

   Nos ta mira dilanti pa cuminsa e trabao di restauracion, revitalisacion di Nassaustraat/ Caya Betico Croes centro di ciudad no ta unicamente un empeño, pa un desaroyo di un centro di ciudad vibrante, di historia, cu un mensahe pero e ta tambe e revitalisacion di e alma di Aruba.

   Cada esfuerso haci pa Monumenten Fonds, inversionnan particular tumando luga na e momentonan aki, ta iniciativanan sumamente importante tuma durante 2009 pa 2017 caminda a mira cu Caya Grandi mester a ricibi un revitalisacion, pa strategicamente conecta Oranjestad bek na nos waf.

   Ta mira empeño di Minister Wever, aunke no a haya sosten di e mesun prioridad, pero un bos den desierto a keda resona y dunando e centro di ciudad e balor cu e merece. Awe un di e proyectonan basa riba e determinacion aki, ta e echo cu awe ta bay restaura e edificio monumental aki.

   Premier Eman a indica di ta sumamente orguyoso, naturalmente cu vinculonan di famia pero semper bou un solo meta di sirbi e bon comun. Hopi exito y bendicion na e pueblo henter y cu nos tur por drenta un 2026 cu locual nos a crea y locual a wordo crea pa nos, cu un determinacion grandi pa crea un futuro nobo pa Aruba.