A cuminza cu accionnan concreto pa bienestar social y salud na Aruba

Den menos cu un aña di gobernacion:

ORANJESTAD (AAN): Durante su prome nuebe lunanan den gobernacion, Minister di Salubridad, Asunto Social, Cuido di Adulto Mayor y Maneho di Adiccion, señora drs. Melvin G. Wyatt-Ras a logra realisa un serie di accionnan concreto cu ta contribui directamente na bienestar social, acceso na cuido di salud y fortalecemento di e sistema di apoyo social na Aruba.

   Desde cu Gabinete AVP-Futuro a drenta den funcion na maart 2025 te cu e dia di awe, e ministerio a enfoca riba mehoracion di apoyo financiero y proteccion social, acceso na remedinan esencial, cuido preventivo y reformanan legislativo cu lo tin impacto duradero riba nos poblacion.

    Fortalecemento di apoyo financiero y proteccion social:  Aki tin indicacion di tur e accionnan concreto cu a wordo tuma caba.

   Desde 1 mei 2025: (*) A aplica un aumento di 250 Florin mensual na reparatietoeslag pa tur pensionado di AOV y pa tur beneficiario di pensioen di viudo of huerfano.

   (*) Gobierno a confirma cu un segundo aumento di 250 Florin mensual lo bay na vigor desde 1 januari 2026, fortaleciendo poder di cumpra di nos adultonan mayor.

   Ademas: (*) A aumenta ayudo financiero pa famianan di menos recurso pa cumpra material di scol pa 250 Florin anual.  (*) A aumenta contribucion pa mayornan di yiu di famianan di menos recurso pa 250 Florin anual.  (*) A aumenta ayudo financiero pa scol na 300 Florin mensual.  (*) A aumenta e suma normativo di bijstand di 450 pa 600 Florin, ampliando proteccion pa e famianan vulnerabel.

   Cuido di Salud:  Esaki ta e acceso reestableci y mehoracion di cuido di salud:

   Desde 1 mei 2025: (*) Un gran parti di e remedinan cu anteriormente a ser kita for di e lista positivo a wordo poni bek, garantisando disponibilidad continuo na remedinan esencial pa e pashentnan.

    Den e area di salud y prevencion: (*) Conseho di Ministro a aproba e plan nacional pa combati obesidad cu a wordo lansa oficialmente.  (*) A inicia implementacion integral pa cuido di diabetes, pa cual Aruba a haya subsidio di Hulanda.  (*) A logra implementa e protocol di referencia entre cuido di prome y segundo liña, fortaleciendo cooperacion entre e docter- y e specialistanan, mehorando e calidad di cuido.

   Salud mental, adiccion y cuido specialisa: (*) A fortifica lasonan existente y a crea vinculo nobo cu diferente instancia den exterior, pa garantisa cu e personanan cu adiccion of problema psikiatrico por ricibi cuido adecua ora cu ta necesario.  (*) A revisa y finalisa e protocol di referencia pa cuido di salud mental.  (*) A duna informacion na e mayornan di muchanan cu limitacion tocante introduccion di ley pa ayudo financiero pa e famianan cu yiu cu necesidad di cuido intensivo.

   Reformanan legislativo y preparacion pa futuro: (*) A inicia actualisacion di e ley di bijstand. (*) A cuminsa cu cambio di legislacion pa preparacion pa pandemia, fortaleciendo e capacidad nacional. (*) Conseho di Ministro a aproba e Proyecto di ley pa muchanan cu limitacion. E Proyecto di ley a wordo inicia formalmente y entrega na DWJZ, cu e expectativa cu Parlamento lo trata esaki den e prome parti di aña venidero.

   Responsabilidad y continuacion di trabao: E logronan alcansa durante e prome nuebe lunanan den gobernacion ta refleha un enfoke claro riba implementacion di accionnan concreto, cuido sostenibel y refuerso di proteccion social.

   Minister Wyatt-Ras y Ministerio di Salubridad, Asunto Social, Cuido di Adulto Mayor y Maneho di Adiccion ta comprometi pa sigui traha cu determinacion pa un Aruba mas saludabel, mas fuerte y mas husto pa tur ciudadano.