Trahando pa fortalece educacion di MAVO na Aruba

ORANJESTAD (AAN): Como parti di e prome ronda di Learning Cities Aruba, e siman aki hunto cu Departamento di Enseñansa Aruba (DEA),

directornan y docentenan di scolnan MAVO, nan a evalua y dialoga riba fortalece e maneho di MAVO, modernisa e curriculum y garantisa mas oportunidad pa  studiantenan na Aruba.

   Ministro di Enseñanza Gerlien Croes, a splica cu dialogo, cooperacion y innovacion ta esencial pa un enseñansa di calidad cu ta prepara e hobennan pa nan siguiente paso den bida.  Docente y directornan tabatin dialogo positivo y por mira cu nan tur kier mira MAVO avanza aun mas.

   Meta principal di e sesionnan aki ta pa evalua y harmonisa e maneho di MAVO y e maneho di revisie (revisiebeleid) den enseñansa secundario. E iniciativa aki ta sali for di e necesidad pa dialoga tocante e proceso di revisie pa garantisa cu esakinan ta transparente, husto y uniforma pa tur scol MAVO na Aruba.

   Tambe lo enfoca riba fortalecemento di curriculum y prepara e studiante debidamente pa e continuacion di nan estudio na EPI, HAVO of mercado laboral. Por ultimo, calidad y innovacion di enseñansa: scucha e retonan cu e scolnan y docentenan ta enfrenta diariamente y debati riba metodologianan moderno, digitalisacion y e contenido di e programanan di estudio.

   E dialogo directo entre e departamentonan di maneho (Ministerio y DEA) y e ehecutornan den e scolnan ta di vital importancia pa crea un vision unifica pa e futuro di nos enseñansa secundario. Ministerio di Educacion y DEA ta expresa nan profundo agradecimento na tur e directornan y docentenan di e scolnan MAVO pa nan compromiso y cooperacion den e proceso aki pa bienestar di e hubentud Arubano.

   E concepto di un Dialogo Nacional riba scolnan MAVO, ta alinea cu e reformanan strategico mas amplio y e dialogo publico-social na Aruba.  Tanto den cuadro di e Maneho Nacional di Enseñanza Aruba 2030 (PEN 2030) structuralmente tin espacio pa dialogo entre scolnan, sociedad, y gobierno, ya caba a cuminza implementa algun avance y inovacion specifico na nivel di MAVO na Aruba.

   Ministro tabatin total aprecio na tur director y docente pa nan compromiso y dedicacion. Hunto enseñanza na Aruba, tur ta crece.