ORANJESTAD (AAN): Parlamentario di AVP, Carlos Bermudez, ta pidi un acercamento coordina pa atende e situacion di servicio di car rental dilanti di aeropuerto.
Durante e conferencia di prensa semanal, el a expresa preocupacion tocante un incidente reciente y a anuncia cu lo e haci pregunta na Minister di Husticia Arthur Dowers y Minister di Turismo Wendrick Cicilia tocante e medidanan necesario pa evita cu e tipo di situacion aki ripiti.
Bermudez a informa cu el a reuni cu CEO di Aruba Airport Authority (AAA), Sr. Jonny Andersen, pa compronde miho e situacion.
Segun e splicacion cu e parlamentario a haya, tin un grupo di compania cu permiso pa opera cu un oficina dilanti di aeropuerto, mientras otro companianan no tin e permiso ey y solamente por busca nan clientenan na aeropuerto y transporta nan bek pa nan propio localidad pafo di e tereno di aeropuerto. Tin tambe un di tres grupo cu e asina yama ‘hustlers’ cu ta ofrece servicio di car rental na bishitantenan sin tin e permisonan necesario pa ta eynan.
Pa Bermudez algo sigur ta cla, y esey ta cu bringamento dilanti di Aeropuerto ta afecta e prome impresion cu nos bishitantenan ta haya di e isla.
E ta enfatisa cu mester actua pa mantene orden y evita situacionnan cu por perhudica e imagen di nos pais.
“Tur hende tin derecho di gana nan pan, pero na e pais aki nos tin ley cu mester cumpli cu nan,” Bermudez a expresa.
El a agrega cu esnan cu kier ofrece e servicio aki mester aplica pa e permisonan correspondiente y informa nan mes tocante e condicionnan pa opera.
Segun e parlamentario, no por laga e situacion sigui sin control te ora un problema mas serio presenta. Ora algo bay robes cu un bishitante, e consecuencia por afecta Aruba como destino turistico. P’esey, el a insisti riba e necesidad di preveni y pone orden.
Bermudez a reitera su peticion pa forma un Task Force cu representantenan di entre otro DTP, KPA, DIMP, DTI y AAA, cu lo coordina control y siguimento. E ta recorda cu, na varios ocasion, el a pidi un ekipo cu participacion di e diferente instancianan pa evita cu kehonan keda sin un respuesta concreto.
Como ehempel, el a menciona kehonan tocante taxi pirata, caminda, segun e, polis ta referi e asunto na DTP y e keho ta sigui pasa di un instancia pa otro. Pa Bermudez, e falta di coordinacion aki no por continua.
E parlamentario ta pidi minister di husticia pa promove un coordinacion efectivo, cu responsabilidadnan cla entre e instancianan concerni. E meta ta pa atende kehonan, controla cumplimento cu e reglanan y evita incidente, protegiendo tanto nos bishitantenan como e empresanan cu ta opera cu e permisonan necesario.
Bermudez a conclui cu pone orden na aeropuerto ta un responsabilidad comparti cu ta exigi accion y siguimento, den beneficio di comunidad y di Aruba su sector turistico.
