Trahadornan sector priva no por carga gasto personal di Gobierno

Conseho Social Economico a expone diferencia na momento enfermedad --- *CAFT tambe ta exigi Gobierno baha gasto di su personal cu ta costoso --- *Turismo mundial atrobe ta observa ola nobo creciente di Covid-19 

ORANJESTAD (AAN)- Gobierno di Aruba mester mantene su gastonan di personal abou. Esaki no ta nada nobo pa Aruba cu ta sigui ricibi informacion sumamente alarmante cu e mester tene na consideracion.

Esaki ta mensahenan cu DIARIO ta ricibi di informantenan experto cu na prome lugar ta mustra cu riba desaroyonan sumamente preocupante rond mundo.

Aruba ta papia di recuperacion a base di turismo cu mester genera entrada. E turistanan cu Aruba ta spera mester bini di entre otro Europa y Merca.

Informantenan a mustra DIARIO con otro ola di Covid-19 ta causa impacto riba turismo for di Europa y Merca atrobe, mester Aruba como parti di mundo mester keda prepara pa cualkier desaroyo nobo cu Covid-19 por presenta na Aruba mes pero tambe pa cifra di turismo cu awor ta recupera na Aruba.

Ayera Hulanda a registra casi 24 Mil caso nobo mientras cu na Merca tambe cifranan a cuminsa subi despues cu e pais tabata spera cu nan lo a baha.

Informantenan a mustra DIARIO cu no ta a base di e reunion di 2020 cu Ministro Raymond Knops por papia di un compromiso cu Aruba tin cu Hulanda.

E debenan cu Aruba tin cu Hulanda ta sumamente halto y Raymond Knops mes a bisa cu Aruba ta practicamente bancarota.

For di 2014 Hulanda a bati na porta di Aruba y Ministro Plasterk e tempo a impone e medidanan di supervision financiero riba Aruba, cu mester baha su gastonan y subi su entradanan.

Informacionnan di DIARIO ta duna prueba cu no ta Hulanda so ta bisa cu mester baha gasto.

Na 2014 e prome rapport di Conseho Social Economico, den cual sindicatonan tambe ta participa, a mustra riba e forma cu e debe nacional di Aruba tabata sigui subi.

Na 2017 e debe aki tabata 4 Miljard (Biyon), cu ta 86 porciento di e Producto Domestico Bruto.

Aruba mester a baha su gastonan y den esaki sigur mester a baha gastonan di personal, cu ta basa riba leynan cu tabata aplicabel tempo colonial.

E gastonan di Gobierno pa su trahadornan sigur ta bini dilanti den e placa cu Gobierno ta paga ora un trahador ta malo y no por presenta na trabou, compara cu e placa cu personanan cu ta traha den sector priva mester paga.

Empresanan priva ta paga e for di cuatro dia despues di AO, 80 porciento durante dos aña.

Gobierno durante dos aña ta paga 100 porciento, despues di tres aña 90 porciento y despues 80 porciento.

Na 2018 esaki a costa Gobierno 62.8 porciento mientras el a costa empresa priva 32.8 Miyon.

Informacion a indica cu for di 2014 hasta a sugeri na Gobierno pa cuminsa busca forma pa elimina cierto trabounan cu por a laga companianan haci pa menos placa.

“Gobierno ta un institucion politico. Ningun politico kier hinca su mes den problemanan cu awe Gobierno Wever-Croes conoce y cu for di 2017 ora el a tuma Gobierno tabata conoci cu mester wordo soluciona. Covid-19 a empeora e situacion,” a wordo mustra.

Mientrastanto sector priva mes ta den problema ya cu empresanan no ta ricibi asistencia financiero mas.

“Normalidad no ta pa trahadornan di Gobierno so pero tambe pa trahadornan den sector priva,” a wordo indica.

Si na e momentonan aki, welga paralisa Aruba, e peliger pa trahadornan den sector priva ta crece.

Mientras e palabranan di Ministro Raymond Knops na Hulanda ta haci como sifuera Hulanda no tabata tin exigencia pa gastonan di personal, Gobierno di Aruba ta bou di supervision di CAFT cu ta mantene cu mester baha gastonan di personal manera ta wordo proba awe dor di DIARIO.